Thinlung Bawng-In

“Isu vawiinah hian kan thinlung bawnginah,

Lo piangthar leh la nang, kan chatuan Lal turin…”

Mizo Kristiante thinlungah hian Lal Isua pianna hmun kan mitthla apianga lo lang thin chu Bawngin leh ranchaw pekna thleng hi a ni awm e. ‘Ranchaw pekna thleng’ han tih pawh hian kan mitthla a lo lang thin  chu ‘Vawkchaw kuang’ hi a ni tam berin ka’n ring ringawt bawk a. Kan hlaphuah thiamten thuk tak maia kan rilrua min lo tuh ngheh sak tawh a nih avang hian Bible sawi aimah hian kan rilruah a fiah zawk hial awm a nia !

Kan urlawk mek, kan nghahhlelh em em Krismas lo thleng tur hi eng ang thinlung puin nge kan hmuah meka, hman kan tum le ? A chunga hla tlar hnih lek ka han tarlan hla khi thinlung takin kan sain kan lampui ngam chiah tak tak em ? Thinlung tlawm, Lal Isua pianna tlak thinlung neiin kan inhre takmeuh em ? He fakna hla phuahtu thinlung ang tawmpui thei hi vawiina Kristiante zingah hian kan tamin ka va’n ringlo em ! He hla hi hla huaisen leh chona ropui tak mai a ni a. Thinlung taka sa tur chuan huaisen a ngai dawn hle niin ka hre thin.

 

ZE THUP

Hmanni chu Mizo Blog directory atangin Mizo Blog hrang hrang ka keu kual vel a. Changkang, mawi leh chhawrnahawm tak takte an ni hlawm a. Mizoten hma kan sawn nasat tawh zia pholangtu pawimawh tak an niin ka hria a, lawmawm pawh ka ti. Blog nei an tam em avangin han len kim vek sen rual a ni lova, ka la leng kual zel mawlh ang.

Ka len kual velna a “Mak” ka tih ve deuh mai mai pakhat chu Blog tin deuh khan an sidebar ah About Me an dah a. Hetah hian ka lo ngaih ve mai mai dan chuan Blog neitu chanchin tawi a inziak turah ka ngai a. Inziak lo tawp chu awmlo mahse an blog tlawhtute tana a neitu han hmelhriat rei ruai theihna tur takngial pawh a awm hauhlo mai a. Mi awmlo inchhunga lenglut ang deuh duka inhriatnate pawh a awm dawn dawnin ka hria a. Blog neitu contact duh tan pawha inkharphui tlat mai engemaw zat an awm bawk. Vantlang chhiar leh tlawh theih tura kan inphochhuak a nih rau rau chuan inthup tit tet a ngai chuang em ni aw..tiin ka ngaihtuah zui ve mai mai a. Kawtthler lun lai takah Nawhchizuarin hmai khuh tlat chungin “Dawr theih ka ni e” tih lehkha ziak keng ta sela; chutiang deuh chu ni mai awm nite’n ka zuk hre rum rum a.

Kei roh hi, hriatna kawngka zim tak nei, thiam aia thiamloh ngah zawk ka nih avang hian ka ngaihdan hi a thing viau pawh a ni maithei tih phei chu ka dawn pha ve kur tho a. Ka ban phak ve ang tawk hnampui, tuipuiral-ho Blog te ka han lut ve rup rupa. Anni chuan an mahni kan hrechiang lovang tih hlau ni zawk awm hiala chiangin an chanchin leh nihna an lo tarlang kiau kuau bawk si a. Mahse ka banphak a tawia, ka len velna ram a zim em a, “Sapho pawhin an ti a..” ti tur khawpa chiang ka ni hauhlo tih ka phalo e. 

Facebook lamah han lenglut ila, kan thiante ngei ngei pawh nula nge an nih NU, tlangval nge PA hriat theih reng reng lova inthup tlat mai enge maw zat an han awm tlat maite hian ngaihtuahna thui lemlo chu mi a siam chiang alawm.

Kei misual, lungmawl ve mai mai hian ZE THUP hnam ang dawn dawnin kan hnam hi ka zuk hmuh phah ti tuai dawn ta mai a. Ka rilru a vak thui zel a, Ze thup hmang kan nih zia tanchhan tur ka han dap chiam mai pek a. Han zawn takah chuan alo tam thei hrep mai lo niin. A langsar zual ni a ka hriat pahnih khat lek tarlan ka duh a.

KRISTA LEHKHA

                                                       (II Kor. 3 : 2, 3. Habakuk 2 : 2,3)

Kan thupui atan KRISTA LEHKHA tih thu hi ka’n thlang a. Lehkha han tih ngawt mai hian a fiah zolo  deuh maithei a. A tawngbul leh Grik emaw, Hebrai tawng emaw hre ve se su lo mah ila. He chang hian a tum tak zawk ni a lang (English Bible kan en chuan) chu, Lehkha satliah mai ni lovin. Lehkhathawn (A letter from Christ) niin a lang a. Chuvangin Lehkha kan tih hian Lehkhathawn kan sawina a ni tih chiang tlang ta ila a tha awm e.

                       

Awle, Kristian, Ringtu zawng zawngte hi Krista Lehkha mitinin an chhiar leh an thlir, Pathian Nung Thlarauvin a ziahte kan ni a. Fakna hla siamtu chuan, “Miten min chhiar, min thlir reng e,.....” tiin alo phuah a. Chuvang chuan ringtute hi khawvel mite awm anga awm ve mai mai thei kan lo ni hauhlo a ni. Paula chuan, “Engpawhnisela, in awm dan chu Krista chanchin tha nen inmawi phawt rawhse” (Phil.1:27) alo ti a. Kan awmdan tinreng mai hi Kristian awm dan tur a ni em ? ti a mahni theuh kan inbih chian fo a tul hle a ni.

                       

Tichuan, keiniho hi Krista lehkhathawnte chu kan ni a. Lehkhathawn kan nihna ah kan tihtur leh kan mawhphurhnate tawitein i han tarlang teh ang.

1. LEHKHATHAWN CHU THAWN CHHUAH A NI : Lehkhathawn chu a thawntu, a neituin a thawn chhuak thin a ni, A thawn chhuah loh chuan lehkhathawn a ni theilo. Ziak sa, envelope-a khung fel diam tawh pawh thawn chhuah a nihloh chuan Lehkhathawn a ni theilo a ni.

                       

Nang leh kei hi Krista lehkha, Pathian Nung Thlarauin a ziah leh a thawn chhuahte kan ni a. Khawvel zawng zawng kala chanchintha hril tura a thawn chhuahte chu kan ni. Paula chuan, “Krista hmangaihna chuan mi tir lui a ni”  ati a. “Tih makmawh ka chungah a innghat a ni” te a ti a. Chu mai chu duhtawk lovin, “Chanchin tha hi hril suh ila, ka chung a pik dawn si a” a ti hial a. Keini hi chanchin tha kan hril loh avanga chung pik inti ka awm em le ?

                       

Thawnchhuah han tih hian Missionary ah kal vek tur tihna lam a kawk ber awm lo ve. Hla taka thawnchhuah an awm laiin hnaite a thawn chhuahte pawh an awm bawk. ‘Kei hi khawi hmunah nge min thawnchhuah ve le ?’ ti a kan in enfo a tul. Chhungkuaa a thawn chhuahte, thenawm khawveng hnena a thawn chhuah te, tin, kan vela ringlote hnena a thawnchhuahte pawh kan lo ni mai thei a ni.

 

KARBI RAM RAWNGBAWLNA

Ziaktu  : Evan. Thangzaliana 

 Nula-in min vua

Sarihajan a kan awm laiin tuk khat chu naupangin,"Pu Thang lokal thuai teh",tiin min rawn kova, kan thawhpuite chu an lo awm tuai tawh a.Kan ringthar nula u leh mi pakhat an lo awm bawk a. Kan ringthar nula chu a u chuan a vua a vaw mai a, a u nula chuan aw ring tak mai in “Engvangin nge ka nau hi mi anglo ah in siam ni ? In sikul hi luhna tlak pawh a ni love,Transfer Certificate min pe thuai rawh u” a ti a,Kei chuan, “In nau hi mi anglo ah kan siam a nilo, camping-ah a lo lut a, Lal Isua alo ring ta a ni mai a, mi an lohna engmah a neilo tiin ka chhang a. A nau a vuakna tiang chuan ka ke ah na deuh mai in min rawn vua a,ka thinur hle na a Pathian zarah ka in bengdai leh thuai a. Kum 30 ka thawh hnu hian tihduhdahna ka tuar hran lova, nula in min vuakna hi ka tawrh awmchhun a ni mai.

Zankhat chu he kan ringtharte inah hian thawktute zawng zawng kan va kal a,thil awmzia an hriatthiam loh em avangin thil awmdan va sawifiah teh ang kan ti a.Tin, kan ringthar Kache-i, a pa unau pa Gauburra (Lal) pawh an ko nghal a. A thuihruaite engnge maw zat an lokal bawk a. Tin, a hmain in thianthat nan kan inah chaw ka lo eipui tawh avangin hemi zan pawh hian inpawh takin kan inkawm a, an fanu kristiana alo inpek dan te ka hrilh a, thu tam pawh kan sawi hma chuan Kache-i u nula chuan bati an chhit zawng zawng te chu a chhem mit ta vek mai a, thu tam pawh a sawitheih lohva, Gauburra chuan, “Ka khua a mite hian Kristian nih an duh chuan ka hnial hauh lova,amaherawhchu min hrilh hmasa zel la a tha ang “ tiin min hrilh a. Kache-i chhungte hnenah hian engmah sawitheih pawh a nilova, kan haw san leh ta a ni. Kache-i hi Lal Isua tan rinawm takin a awm tlat a, keini missionary te min ngai em em a, a chhungte hi missionary te chungah an thinrim em avangin an inah hian len ngam chi a nilo,

Kan bial a tlangval pakhat chu Baptisma a chang a, chumi hnuin a nu leh pa te chu chang turin a nawr thin a. An la duh ve chiah silova,”Baptistma in chan loh chuan ka vaw darh vek mai ang che u” a ti a,a thu an awih mai siloh avang chuan an zu belte chu a vuak chhiat sak a, a hnu ah chuan a nu leh pate chuan an chang ve ta a, an hlim ta em em mai a, an pitar erawh chu a in pe ve duhlo a. Karbi sakhuaah a ruh em em a ni, Tin, Kristian tharte hi an sakhaw hlui a an inthawina leh hmanrua zawng zawng te Kohhran ten kan hal sak thin a, Biak In awmna ah chuan Biak In hungchhung ah kan dinhual a, tawngtaina kan hman zawhin kan hal thin a. Biak In awmloh-naah chuan ramhnuaiah kan hal thin a ni. Hemi ka sawi lai hi Hidipi khua a ni a, Ringtharte hian an Pathian tan vawk an lo vulhte chu Kohhran an pe a, ruai kan theh a, a thente erawh chu anmahni tuam zui nan kan hmang a,a hlim-awm hle a ni. Amaherawhchu an inthawina bungruate ramhnuai a kan phurh-chhuah lai chuan an pitar chu rilru na in a tap vawng vawng mai a. A khawngaih thlak kher mai, kei phei chu,”Pathian thuhrilin lokal tawh reng reng suh” min ti mawlh mawlh mai a ni

CHANCHINTHA THILTIHTHEIHNA

Synod Mission Board hnuaia Mission Field hrang hrangah Chanchintha thiltihtheihna avanga Thlaraubo chhanchhuaha an awm zel chanchin han hriat thin hi a ngaihnawmin a va’n ropui thin tak em ! Missionary te inpekna tlawm tak Pathianin a ropuina puanchhuahna hmanraw tangkai taka a la hman zel avang hian kan rawngbawlna hi Lalpan a pawma, mal a sawm ngei a ni tih hre thar lehin tan ila zel ang u.

Chanchintha thiltihtheihna ropui tak zinga pakhat Karbi Anglong Field, Sarihajan Pastor Biala Upper Dillai khua a lo thleng mek chungchang tawitein i’n tarlang teh ang.

Upper Dillai khua hi khaw lianlo tak a ni a. Kum 2008 kum tawp lam khan Kristian chhungkaw pahnih lek awmin Fellowship din a ni a. Sarihajan Compound a Missionary-ten Biakin, Maurap hmangin an sak saka. Beisei angin Kristian an pung mawh angreng hle a, khawhar takin hemite chhungkaw hnih hian an Biakin tlawm tak chu an luahlum ve hram hram zel a ni. Kum 2009 kum tawp lam hnaih khan an khua a damlo, pa pakhat  Rupsing Timung chu a taksa pangkhing zeng natna in a man a, che theilo leh mangang em emin a awm a. Natna khirh tak a vei lai chuan Lal Isua mamawhna lian tak a nei a ni tih a inhre ta a. Tichuan Kristianah a inpe ta a. Mak tak main Kristiana a luh atangin a natna zawng zawng chu a dam ta viah mai a. Hna rum tak tak pawh thawk leh theiin a dam ta viah mai a ni.

KA TAP LO

Mizo chhiar danah chuan, “Kumchhir” a piang kan ni a. Thla 19 zet kan inkarah a tla thung. Naupan tet atanga  phir ang maia enkawl kan ni a. Kan taksa a intiat rual a, kan thilneih leh thawmhnaw pawh a inang chiah chiah zela lei sak thin kan ni. Phir emaw ti a min haitu an tam thin khawp mai.

                        
Kan naupan lai chuan ka banah hian min kai thin a, a nau ka nih avangin mi a duata; min len pui fo thin. Zanah Pawnto turin kan chhuak a, thimtham zinga keimaha ka haw ngam loh avangin mi a haw san ngailo.

                        
Naupang a tak ka nih avangin pawnto-naah leh in Selem chaih nikhuaah te hian thiante tih duhloh thil tam tak ka ti thin a. Min zahpui avangte leh mi a khawngaih avangtein mi a velh leh hauh chang a awm bawk thin.

Outlaw

CONVICT

Ka nun chhungril chu a rum tlawk tlawk a;pachang taka tuar tumin ka theihtawp takmeuh takmeuh ka chhuah a. Mahse tuar aharina va’n na tak em! Ka mittui dan kir tumin ka mit ka khap sawk sawk a; ka dang zo silo.Mittui bual velin ngam leh ngamlo chung hian ka han hawi chhuak a. Min thlirtu mipui te chu ka hmu phe rei ruai a. Beiseina reng reng nei tawhlo, mi beidawng, nun tla chhe mek hmel hmuh chaka min thlirtu mipuite chu ka va’n zah tak em!

Police in min karcheha,ka banrek te chu hand-cuff a thlun zawm a ni a. Ka kut ka chet vel zawng chuan min thlunna thir khaidiat chu a ri leh chhawng thina; ri a zawnga ri rapthlak ber leh ngaihawmlo ber niin ka hria.

Ka khualzinna

Kum 2001 April thla a ni a. Pathian kohna chhangin Mizoram chhim thlang tawp Parva khua a Missionary ni turin Aizawl atangin Lunglei lam panin kan chhuak a. Hetih lai hian  Mampuia hi kum 2 mi chauh a la ni a, Bawihtei hi a nu-in a pai mek a ni. Chhim lam la kal ngai reng renglo nih bakah Parva khua chu Map atanga han enin a tawp lulai lutuk a; rilruah chuan huphurhna a lian hle mai a. Nimahsela, leilehna ah kan kut kan lo nghat laklawh tawh a, kir leh zia zang kan ni silo.

Lunglei khawpui, mihring tam tak awmna hmunah hian hmelhriat leh chhungkhat hnaivai reng reng kan nei hauhlo maia. Mang chu a ang hman deuha. Hnahlan kan awm laia kan Pastor Rev. R.Ramdinmawia te an awm tih kan hre ta hlauh maia. An ni hi kan va bel ta chawt mai a ni.

Nu ber rai puar ta luah mai chu kan hotuten, “Inhruaina chi ziazang a ni love” an tih tak avangin chawpchilh takin Lungleiah in luah tur kan zawng ta chuk chuk a, Chanmari vengah remchang tak hmuin kan luah lut ta rawih a.

Tichuan nupui fanaute tel lovin Parva lam pan chuan ka liam ta a. Bungtlang South thleng motor a kalin Bungtlang South atang hi chuan ke hlira kal a ngai tawh a. Tehna mumal tak a awmlo na a, Parva khua thleng tur chuan KM 60 chuang zet kal a la ngai a ni. A lo berah ni hnih tal kal a ngai tihna a ni ber.

Kalkawng a ka hun khawhral dan, ke durh piap puapa ka bai suih suih laite, nisa rumrut mai ruia kawng laia ka mut ngawih ngawih dante leh tamchhawl avanga ramhnuaia riah mai ka rilruk dan zawng zawngte sawi vek sen a ni lova. Tunah chuan lung ti leng, ngaihawm tak an lo chang zo ta a ni.

Lalpa laka kan rochan fanau te

Kan fapa duat : C.Vanlalchhandama (Mampuia)

Kan fanu duatlai : C.Vanlalruatmawii (Nutei)

A bul tanna atan....

Mi fate chuan Internet leh Computer lamah thiamna sang pui pui an nei a. Website leh Blog chhuanawm tak tak an nei hlawm tih ka hria. Kei akarin hetia Blog kan siam ve ngawt mai hi ka thiamna leh finnaten a phak velo tih ka hria a, miin an ti thin tih ka hriat avangin ka han ti ve chawih mai a ni. Enge maw zawng tak chuan zahthlak te pawh ka ti deuh.

Mi han rawn tur ka nei ve lem lova, mi blog te ka bih kual vak vaka, risk takmeuhin ti hian ka han chhuah ve phawng mai a ni e. Min nuih duh tan chuan ka nuihzatthlak ngawt ang le ! Phak tawk ala ni rih miau si a.

Khawhar hnem atan, kei leh ka chhungte leh thiante tan.... Suangtuahna leh rilrua awmte leih buak hawk hawkna atan. A tul dan ang zela hman chhoh bawrh bawrh atan nise.

He blog hi ilo chhiar palh hlauh anih pawhin, min nuihzat viau anih chuan min nuih nghek la. Thurawn erawh chu i theih ang angin min pe ve dawn nia aw.

Ka Blog hming VOILA hi a awmzia i ngaihtuah maithei, chhut buai duh suh kei ngei pawh hian a awmzia ka hre bik lemlo a nia. Ka engkimah hian he hming hi ka hmang thin....

Ka lawm e.