Ka hmangaih, ka Chhungkua...

Engtik lai khan nge kan naupan lai kha aliam ka hre lo a. Eng laiin nge kan hlim nite kha a herliam ka hre lo. Heti maia rang hian aliam ang tih hi ka lo ring ngai reng renglo ani. Hetiang hian  unau te hi kan lo seilianin, kan naupan rilru thianghlim lai kha chak takin kan kal pel ang tih hi ka lo ngaihtuah phak ngailo a ni

Khang hun kha kohkir leh theih nisela ka theihtawp ka chhuah ang, ni e..ka theihtawp tak meuh meuh ka chhuah ngei ang. Khang, chhangchhe tak leh mawi leh tha pawh dawn miahloa kan nun lai hun kha 'Nun Rangkachak' ani tih hi ka lo hrelo ani ! Ka hriatchhuah ve meuh chuan avaiin alo herliam vek tawha, khawiah nge an awm tak tih pawh ka hre thei tawhlo. Khawlaia naupang tapte hi ka awt ngawih ngawih ang tih hi ka in ring phak lo.

Ka nau te u,  ka la awm khamlo che u asin ! Ka la paw khamlo che u a; in biangah te ka la fawp khamlo, ka khamlo lutuk ! Heti em em hian kan thanglian chak anga,heti tak hian kan in hlat ang tih hi ka lo hrelo ani. A hrehawm ka ti, hetiang ema kehdarha inhlat ai chuan khang hunah te khan kir leh kha ka thlang zawka, ka thlang kumkhua ang !

Ka ngai em em che u a, in tello hian ka nun hi a kimlo, a ruak vek ; ka ngai che u, ka ngai ngawih ngawih che u ani. Nangmahni thlaktu tur hi ka thinlungah tumah an lo luh ka phal theilo. In tello in engmah a tuilo a, engmah a hmuhnawm ngai bawklo. Ka theihna leh chakna neih zawng zawng ka pek theih nan che u min pui ta che u. Ka nu leh pa te u, ka hmangaih khamlo che u a, in  bula naupan that leh hi ka chak asin. Ka duat chak che u a, in inhlat lutuk hi a hrehawm ka tih ber ani. A pawi ka ti lutuk..!

In tello chuan ka dam zo lo, ka mal lutuk hetah hian. Ka tuar zo dawnlo in ka hria, min rawn hrereng rawh u. Nitin hian ka ngai lutuk che u, tah loh ni hi ka nei ngailo. Ka ngai che u, ka ngai lutuk che u.....

(Ka thian leh ka nau, Nl Chhantei'n a thinlung a phawrhna thu hi ka han dah ve ani e. A dinhmun hriatpuia thlirpui chuan thinlung a khawih takmeuh a ni.)

KA U VALA

I kal ni atang khan kum sawm chuang zet a lo vei ta reng mai. Eng ka ti ni maw, min kalsan daih ni kha ka theihghilh ngai miahlo thin kha a ni a. Kumin chu ni li zet liam hnuah ka han hre chhuak ta chauh a nih hi. A lawmawm lam ani ngei ang ti raw ? Kan upate'n, "Fam ngaih chu khuareiin a hnem" an lo tih kha maw.

Hman zan chu Matea'n min rawn message a, "Apa Sen, min rawn phone la, Mate, Tesawi min rawn ti teh" a ti a. "Engati nge Mate ?" ka tih chuan, "Aapa aw leh i aw a inanga, ka ngaithla duh alawm, Aapa hi ka ngai lutuk" a ti a. Min ti hrilh hai asin aw..Mahse, kan inbia a, ka thiam leh theih ang ang chuan ka han hnem ve ta kha a nia. Hrilh duh che leh i thurawn lak ka mamawhna te hi tam tak a awm asin. 

Ka la ngai em em che a ni. Ka nu nen in awm dun ngei awm biksi a aw........

Tawngtaina

Pathian hnena ka tawngtai hian min tih hlawhtlin sak ngeia ka rin, chhan awm hliah hliaha ka rinah te hian chhanna ka hmulo fo thina. Ho lam leh nuihzatthlak zawk hiala ka lo ngaih thinah te hian min chhang leh khurh roh lawi thin si a; kan Pathian hi Pathian MAK tak ani tih hi a chiang ngawt mai.

Parva – II a ka awm dawn khan nupui fanaute nena kal a rem chiahloh avangin tumloh deuhin hmelhriat leh laina pawh kan neihlohna Lungleiah hmanhmawh baklengin in luah tur kan zawnga, kan invawm lut rawk rawka, ka liam san ta mai kha a ni a. Ngaihtuah nak alaiin mumang thalo deuh deuh man ka ching thina. Nileng maia ka mumang avanga awm nawmloh changte kha ka nei thin. Mumang thalo laka min veng tura Pathian dil hi naupang tawngtaina awm deuhah ka lo ngai  mai thina. Nimahsela, ka lo mamawh hle ani tih hriain, “Lalpa, mumang thalo lakah min veng ang che” tih chu ka zan mut dawn tawngtaina thupui zinga pakhat ani chho ta a. “Mumang tur thleng thleng chuan min tibuai teh suh, a tak tak pawh ni hleilo” min tih san miah lova ka mamawh min hriat saktu Pathian hi a tha ka va ti em  !!

Nikum(2011) Khagaria kan awmlai khan tlai khat chu kan member nu pakhat hi tap deuh pur hian alo kal a. An Bawngpui rai lai a pum chhungah a note a thi a, a note a hram tawh si a, a hring chhuak thei silo. Vety Doctor an pun pawhin tihngaihna a hriat sak tawh lova, tawngtai sak turin min rawn ko hi alo ni a. Ka thawhpui, a rammi nen chuan kan insiama “Bawngpui han tawngtai dawn chu leh” tiin ka nuih a za tlat mai a. “Awmlo” riaua hriatna hi ka nei tlat a !! 

Ka Birthday Pu O. Daniel-a tan....

Thingtlanga seilian, khawhawi zau lemlo tih takah Birthday lawm tih vel hian ka rilruah hmun a’n luahlo ve khawpa. Pian ni, kum leh thla te chu hre ve kuau mah ila, a hun leh ni alo thlen pawh hian ka hrechhuak chuang ngai hlei law. Kum hnih-thum vel liam ta a Internetin min rawn luhchilh ve tak atang khan eng website site-ah emaw hian ka in register ve nasa khawpa chung website thenkhat ho chuan ka birthday alo thlen hian Email hmangin min rawn “Wish” ve thin a. Social Networking thenkhat leh a bik takin Facebook phei chu regular taka ka keu thin alo nih avang hian Birthday lawmpuina thu, thiante hnen atanga han dawn thin takah chuan ka Birthday pawh ka theihnghilh khat ta hle.Birthday lawm ngailo leh buaipui ngai talo chu Present pawh ka dawng ngai bawk heklo.

Nikum 2011 khan kan chhungkuain ‘pa’ ang maia kan en thin Pu Osmand Daniel-a damlo tlawhin tlaiah an inah kan va leng a. Chumi tum chuan ka nuna thil danglam tak mai, ka theihnghilh reng reng tawhloh tur ka tawng a, chu chu Birthday Present a ni. Kan damlo kan ber Pu Daniela chuan, “Engati nge i Birthday pawh min hrilh loh ?” tiin min lo chhuahchhal a. “Birthday ka lawm ve ngai hleinem” ka ti liam puat a. An room ah a va luta, Envelope hi a rawn hum chhuaka, “Kha la rawh” a ti a. “Enge ni a ?” ka lo ti hu a. “Birthday Present mawle “ tiin a nui huau huau a. Kan hawn kawngah envelope chu kan han hawnga, Rs. 1000 hi a lo thun alo ni a. Pawisa chu awlsam takin tul lemlo leina atana  hmanral theih anih avangin leh ka birthday present ka dawn ve chhun liau liau anih avangin thil tha lei ka duha. Dawr ah kan lut nghala, kekawr tha zet mai Rs. 980 man ka lei ta a ni.

Vawiin ka Birthday, 20^th September, 2012 alo thlen leh hian Pu Daniela ka hriatrengna hi a thar zuala, atan he ka Birthday (NI) hi ka hlan  a ni.

Mr. Osmand Daniel

Hindi a mik a mak pawh hre eih lovin Khagaria, Bihar State-a District pakhat khawpui hi kan chhungkuain  2011 January thla khan kan lut a. Hlauhthawnna leh huphurhna hlirin rilru a kam tun mai. Amaherawhchu Pathianin kan tlukluhna tur inpui leh chhungkua min pe a, chu chu Pu Osmand Daniela te chhungkua hi an ni. Hausakna thuah hnih nei chhungkua an ni a, chu chu khawvel hausakna leh thlarau lam nun hausakna a ni. Kristianna hi an nunah a takin a hmuh theih.

School lian leh changtlung tak mai, Rosebud Academy an tih chu hmun hnihah an nei a. “Kristian School” ti a hriat ani bawk. He an School ah hian kan fate pahnih a thlawnin an kaltir a. A thlawn ka tih hian an uniform kan lei bak chu engkim a thlawn vek a ni. An zirlaibu, admission fee,  tution, monthly, exercise book..etc. Cheng sing tam senna tur a ni. Hemi avanga lawmthu ka hrilh tuma min chhanna hi ka  theihngilh theih ka ringlo. “Lawmthu min hrilh reng reng suh, kei chuan ka tihtur (duty) ka ti mai a ni. Bakah Missionary-te kan tanpui hian Pathian malsawmna tam tak kan dawng let thin asin. Kan School ah naupang tam takin an pun phaha, nangmahni hi kan tan malsawmna in ni zawk asin” a ti a nih chu. South Indian lam Missionary kan thiante fate ho pawh keimahni ang chiah thovin  a thlawnin an fate an zirtir a ni.

Dawr ah thil lian tham deuh lei dawn ila Bihari hovin min bum an hlau a, a faten min kalpui zel a. Office dawr a ngaih changte pawhin mi rinawm leh chinchang hria kalpui tur min dap saka. Cooking Gas phei chu Connection pangngai kan neih veloh avangin anmahni kan ring tawp mai a ni. Bawng lian chi mi an vulh tira, a hnute hi litre 4/5 dawn dawn hian min rawn pe thin bawka, a manhla thin hle a ni. Mimala min tanpuinate sawi vek sen a ni lo, a tam lutuk.

FACEBOOK-A MP3 PLAY NGHAL THEIH DAHLUH DAN

Kum liam ta atang mai khan Zofate zingah FACEBOOK hian hmun pawimawh tak rawn luah chhovin, kan hmang nasa em em a. Tun dinhmunah hi chuan a thatlohna lam ai mahin a thatna lam sawi tur a tam awm e. Tangkai takin i hmang zel teh ang u.

Ka thianpa Rothuama Sailo in Aizawl atangin min rawn phone a, “Facebook a MP3 upload dan i thiam mial lo maw ?” tiin. Ka lo ngaihtuah lam a ni loh avangin ka bangbo khawp mai a. Facebook hian Video leh Thlalak vawmbeina tur remchang min siam sak laiin hla ngaihthlakna tur lam min chhawp sak lemlo alo ni a. Ka theih ang angin ka zawngkhawma, 2/3 vel enchhinna atan ka post chhin bawk a. Ka post lo hmutu thian thenkhatten min rawn zawt zui veleh zel bawk a. Facebooka ziah atan chuan a thui tham bakah a lem enge maw zat dahluh ka duh bawk si avangin  ka blog update na remchang ni maiah ka ngai a, ka han buatsaih chuk chuk a. Ka zawn khawm zinga  tha deuh ber ni a ka hriat ka han share dawn che u a ni.

Kan sawi turah hian MP3 mai ni lovin, thlalakte, video leh thuziakte pawh awlsam takin facebook-a kan wall ah leh thiante wall mai bakah Group ah pawh kan bel zung zung thei dawn a ni.

Facebook i hawna, click zeuha mp3 ngaihthlak theihna chu:

1. A hmasa berin HEI HI hawng la, SIGNUP phawt ang che.(SignUp kherloh pawhin iti thei tho a, mahse nangma tan a ni e; a har chuang silo.)

2. Tichuan i Facebook hawng la (Log In) HETAH  hian kal la. A hnuaia tarlan ang hian i Facebook ah Divshare Application hi i add dawn nia. "Go to App" hi click ang che.

3. Request Permission a lo lang anga, Allow hi i click anga.

 4. I tih zawh hunah i Facebook Home ah khan kal la, a hnuaia mi ang hi APPS ah khan alo lang tawh ang,     Click teh le.

5. A hnuaia mi ang  hi a lo inhawng anga, Upload tih atang khian i File duh, i Computer chhung ami kha i duh duh i Upload tawh mai dawn a ni.

6. I file i Upload zawh ah  a hnuaia tarlan ang hian i Facebook i tag in i share thei tawh a, i wall ah i post thei tawh bawk dawn a ni.

6. Tichuan Facebook atangin CLICK zeuhin hla i ngaithla tawh ang.....

U P D A T E

A chunga mi aimaha awlsam leh nuam ni a ka ngaih hetah hian ka han ziak nawn leh a nge. Awlsam kan tih zawk takin......