HMUHNAWM

Hun thawl hek hawka Movies hmuhnawm tak mai han en veng veng mai hi nuam ka tih zawng tak mai a ni a. Korean Drama hote hi a hmuhnawm thawkhat aniang, nuhoin an han en tak tak hi chuan an chaw chhuan lai theihnghilh thakin an en thei a, an chhuang ut rem ruam  mai chu a nih hi. Korean ho film chan dan hi hautaklo leh insengso tam silo, hmuhnawm tak si an nih hlawm avang hian an ngaihsanawm hranpa riau a. An hmelthatna hian mi a lem viau bawk. Zu an leklam lutuk erawh hi chuan mit a tikham deuh thin mai pawh a.

Khawvel pum ngaihtuah pawha hmuhnawm leh mak Taj Mahal ropui zia leh hmuhnawm dan chu sawifiah mai theih pawh a ni lova. Mihring kutchhuak a ni ang tih rinhlelhawm rum rum khawpa hmuhnawm a ni. History lam atanga thlir chuan a hmuhnawm dan hi a rapawm thei deuh roh nghe nghe.

School naupangte School Uniform mawi tak nena an han thelh siau siau mai hi hmuhnawm leh mit ti tlai tak mai an ni a. Kan ram rohlu, nakin atana kan nghahfak, kan ram min la hruaitu turte an ni tih ngaihtuahna mit nena thlir phei chuan an mawina a zuala; an hmuhnawm ngawih ngawih mai.

Sipai, an ralthuam leh uniform famkim nena an han inthuam, kalrem hla nena an han parade thup thup mai hi an hmuhnawm thlawt bawk mai. Kan ram leh hnam humhimtu, thih pawh tih lova kan tana chhun leh zan thlu lova an hun hmang thintute an ni tih ngaihtuahna thinlung pu chunga thlir phei chuan an hmuhnawmna hian lung hial a tichhe thei nia.

Tlangval hrisel pangngai tana nula zei leh hmeltha tluka hmuhnawm thildang hi a vang duh khawp ang. Phuloh leh chan phak reng reng loh tur tih chiang rengte pawh hi an hmuhnawmna a nep chuang lova. Rilru ngaihtuahna an ti bing chuk chuka, suangtuahna ramah min hruailutin ‘hisap’ thui luat awm lek lova tisa chakna kaithotu an ni fo.

He hringnun khawvelah hian hmuhnawm leh mit ti tlaitu hi a van tam tehreng em ! Eng hi nge hmuhnawm kan tih ber thin le ? Mimal ngaihdan a hrang nuaihin a rinawm.

Hmanni lawk khan Bihari nu pakhat, dum leh hmelchhe berh ve tak, pawr chep chawp tak mai, in leh lo mumal pawh nei lova kawngsir leh hmun remchang apianga riak mai thin hian kawngsirah a fa sente, bawk lil lel, ring rek leh lu lawk ber maite hi duat tak maiin a lo pawm a. A khat tawkin a biangah leh hmuiah fawpin a en ngawih ngawih mai a. Lehkhakhawng them hian a zap dai hliau hliau bawka. Khawdang pawh hawisan rei thei lovin chu a naute chu enin a nuih leh ver ver thin. Chu nu che vel chu hmuhnawm ti angreng takin ka thlir deuh reng a.

Ni, khanu nen khan kan hmuhnawm tih zawng alo inang reng mai ! Ka fate hi ka tan chuan he damlai khawvela ka tana thil HMUHNAWM ber an ni si a. Keimah ang bawk hi mi tam tak an awm ang tih ka hria.Nupuiten nau an pai tih kan han hriat tirh phat atang hian nupuite dul/pum chu hmuhnawm leh ngaihtuahna peng pakhat luahtu a ni nghal chat a. Naute, a nu pum chhunga lo thang lian ek ek chu a chanchin hriat chakin zantin mut hmunah nu pum kan chul heuh heuh a. Nu pum chhunga a che telh telh leh a lo thanlen deuh hnua a han in leng bat bat maite chu hmuhnawm tawp hi a ni ringawt !

Khawvel eng hmachhawna tap chunga a rawn chhuah laite chu ngaihnawm leh hmuhnawm a ni zel a. A hmel a chhiat a that emaw, a ngo leh a han thu emawin mi a ti buailo. “Ka rila rah, ka thisen anih avangin ka tan chuan a tha ber a ni ringawt”

Lawma nuih nachang an hre tante, an han bawhkhup theih tante chu hmuhnawm a ni zel a. Bawkkhup chunga an han tleng theite leh bawkvak chunga kal an han thiam tan. “Ding le le” tih hnu ah “Kal chhet chhet” tih ruala an han pen chhet chhet te chu a va’n hmuhnawm tehlul em ! Nitina an nungchang rawn inher danglam chho tial tialte hi nu leh pa tan chuan “Ennawm mak thar” a ni ta zel thin a nih hi.

Thildang mitin a hmuh, mit titlai leh hmuhnawm kan tih thin tam takte hi kan kianga awm, englaipawha kan hmuh theih ni ta se ‘ninawm’ emaw ‘hne-awm’ emaw an ni thuai fo thin a. Chutiang anih loh pawhin kan mit hian ngaiah neiin hmuhnawm tihna mit nen thlir a har tawh thin a ni.

Mahni rila rah, Pathian laka kan rochan, malsawmna min pek kan FANAUTE erawh hi chu kan damchhung atana hmuhnawm an ni dawn si a.

Nang enge hmuhnawm i tih ber thin le ?