Ka hmangaih, ka Chhungkua...

Engtik lai khan nge kan naupan lai kha aliam ka hre lo a. Eng laiin nge kan hlim nite kha a herliam ka hre lo. Heti maia rang hian aliam ang tih hi ka lo ring ngai reng renglo ani. Hetiang hian  unau te hi kan lo seilianin, kan naupan rilru thianghlim lai kha chak takin kan kal pel ang tih hi ka lo ngaihtuah phak ngailo a ni

Khang hun kha kohkir leh theih nisela ka theihtawp ka chhuah ang, ni e..ka theihtawp tak meuh meuh ka chhuah ngei ang. Khang, chhangchhe tak leh mawi leh tha pawh dawn miahloa kan nun lai hun kha 'Nun Rangkachak' ani tih hi ka lo hrelo ani ! Ka hriatchhuah ve meuh chuan avaiin alo herliam vek tawha, khawiah nge an awm tak tih pawh ka hre thei tawhlo. Khawlaia naupang tapte hi ka awt ngawih ngawih ang tih hi ka in ring phak lo.

Ka nau te u,  ka la awm khamlo che u asin ! Ka la paw khamlo che u a; in biangah te ka la fawp khamlo, ka khamlo lutuk ! Heti em em hian kan thanglian chak anga,heti tak hian kan in hlat ang tih hi ka lo hrelo ani. A hrehawm ka ti, hetiang ema kehdarha inhlat ai chuan khang hunah te khan kir leh kha ka thlang zawka, ka thlang kumkhua ang !

Ka ngai em em che u a, in tello hian ka nun hi a kimlo, a ruak vek ; ka ngai che u, ka ngai ngawih ngawih che u ani. Nangmahni thlaktu tur hi ka thinlungah tumah an lo luh ka phal theilo. In tello in engmah a tuilo a, engmah a hmuhnawm ngai bawklo. Ka theihna leh chakna neih zawng zawng ka pek theih nan che u min pui ta che u. Ka nu leh pa te u, ka hmangaih khamlo che u a, in  bula naupan that leh hi ka chak asin. Ka duat chak che u a, in inhlat lutuk hi a hrehawm ka tih ber ani. A pawi ka ti lutuk..!

In tello chuan ka dam zo lo, ka mal lutuk hetah hian. Ka tuar zo dawnlo in ka hria, min rawn hrereng rawh u. Nitin hian ka ngai lutuk che u, tah loh ni hi ka nei ngailo. Ka ngai che u, ka ngai lutuk che u.....

(Ka thian leh ka nau, Nl Chhantei'n a thinlung a phawrhna thu hi ka han dah ve ani e. A dinhmun hriatpuia thlirpui chuan thinlung a khawih takmeuh a ni.)

Tawngtaina

Pathian hnena ka tawngtai hian min tih hlawhtlin sak ngeia ka rin, chhan awm hliah hliaha ka rinah te hian chhanna ka hmulo fo thina. Ho lam leh nuihzatthlak zawk hiala ka lo ngaih thinah te hian min chhang leh khurh roh lawi thin si a; kan Pathian hi Pathian MAK tak ani tih hi a chiang ngawt mai.

Parva – II a ka awm dawn khan nupui fanaute nena kal a rem chiahloh avangin tumloh deuhin hmelhriat leh laina pawh kan neihlohna Lungleiah hmanhmawh baklengin in luah tur kan zawnga, kan invawm lut rawk rawka, ka liam san ta mai kha a ni a. Ngaihtuah nak alaiin mumang thalo deuh deuh man ka ching thina. Nileng maia ka mumang avanga awm nawmloh changte kha ka nei thin. Mumang thalo laka min veng tura Pathian dil hi naupang tawngtaina awm deuhah ka lo ngai  mai thina. Nimahsela, ka lo mamawh hle ani tih hriain, “Lalpa, mumang thalo lakah min veng ang che” tih chu ka zan mut dawn tawngtaina thupui zinga pakhat ani chho ta a. “Mumang tur thleng thleng chuan min tibuai teh suh, a tak tak pawh ni hleilo” min tih san miah lova ka mamawh min hriat saktu Pathian hi a tha ka va ti em  !!

Nikum(2011) Khagaria kan awmlai khan tlai khat chu kan member nu pakhat hi tap deuh pur hian alo kal a. An Bawngpui rai lai a pum chhungah a note a thi a, a note a hram tawh si a, a hring chhuak thei silo. Vety Doctor an pun pawhin tihngaihna a hriat sak tawh lova, tawngtai sak turin min rawn ko hi alo ni a. Ka thawhpui, a rammi nen chuan kan insiama “Bawngpui han tawngtai dawn chu leh” tiin ka nuih a za tlat mai a. “Awmlo” riaua hriatna hi ka nei tlat a !! 

FACEBOOK-A MP3 PLAY NGHAL THEIH DAHLUH DAN

Kum liam ta atang mai khan Zofate zingah FACEBOOK hian hmun pawimawh tak rawn luah chhovin, kan hmang nasa em em a. Tun dinhmunah hi chuan a thatlohna lam ai mahin a thatna lam sawi tur a tam awm e. Tangkai takin i hmang zel teh ang u.

Ka thianpa Rothuama Sailo in Aizawl atangin min rawn phone a, “Facebook a MP3 upload dan i thiam mial lo maw ?” tiin. Ka lo ngaihtuah lam a ni loh avangin ka bangbo khawp mai a. Facebook hian Video leh Thlalak vawmbeina tur remchang min siam sak laiin hla ngaihthlakna tur lam min chhawp sak lemlo alo ni a. Ka theih ang angin ka zawngkhawma, 2/3 vel enchhinna atan ka post chhin bawk a. Ka post lo hmutu thian thenkhatten min rawn zawt zui veleh zel bawk a. Facebooka ziah atan chuan a thui tham bakah a lem enge maw zat dahluh ka duh bawk si avangin  ka blog update na remchang ni maiah ka ngai a, ka han buatsaih chuk chuk a. Ka zawn khawm zinga  tha deuh ber ni a ka hriat ka han share dawn che u a ni.

Kan sawi turah hian MP3 mai ni lovin, thlalakte, video leh thuziakte pawh awlsam takin facebook-a kan wall ah leh thiante wall mai bakah Group ah pawh kan bel zung zung thei dawn a ni.

Facebook i hawna, click zeuha mp3 ngaihthlak theihna chu:

1. A hmasa berin HEI HI hawng la, SIGNUP phawt ang che.(SignUp kherloh pawhin iti thei tho a, mahse nangma tan a ni e; a har chuang silo.)

2. Tichuan i Facebook hawng la (Log In) HETAH  hian kal la. A hnuaia tarlan ang hian i Facebook ah Divshare Application hi i add dawn nia. "Go to App" hi click ang che.

3. Request Permission a lo lang anga, Allow hi i click anga.

 4. I tih zawh hunah i Facebook Home ah khan kal la, a hnuaia mi ang hi APPS ah khan alo lang tawh ang,     Click teh le.

5. A hnuaia mi ang  hi a lo inhawng anga, Upload tih atang khian i File duh, i Computer chhung ami kha i duh duh i Upload tawh mai dawn a ni.

6. I file i Upload zawh ah  a hnuaia tarlan ang hian i Facebook i tag in i share thei tawh a, i wall ah i post thei tawh bawk dawn a ni.

6. Tichuan Facebook atangin CLICK zeuhin hla i ngaithla tawh ang.....

U P D A T E

A chunga mi aimaha awlsam leh nuam ni a ka ngaih hetah hian ka han ziak nawn leh a nge. Awlsam kan tih zawk takin......

HMUHNAWM

Hun thawl hek hawka Movies hmuhnawm tak mai han en veng veng mai hi nuam ka tih zawng tak mai a ni a. Korean Drama hote hi a hmuhnawm thawkhat aniang, nuhoin an han en tak tak hi chuan an chaw chhuan lai theihnghilh thakin an en thei a, an chhuang ut rem ruam  mai chu a nih hi. Korean ho film chan dan hi hautaklo leh insengso tam silo, hmuhnawm tak si an nih hlawm avang hian an ngaihsanawm hranpa riau a. An hmelthatna hian mi a lem viau bawk. Zu an leklam lutuk erawh hi chuan mit a tikham deuh thin mai pawh a.

Khawvel pum ngaihtuah pawha hmuhnawm leh mak Taj Mahal ropui zia leh hmuhnawm dan chu sawifiah mai theih pawh a ni lova. Mihring kutchhuak a ni ang tih rinhlelhawm rum rum khawpa hmuhnawm a ni. History lam atanga thlir chuan a hmuhnawm dan hi a rapawm thei deuh roh nghe nghe.

School naupangte School Uniform mawi tak nena an han thelh siau siau mai hi hmuhnawm leh mit ti tlai tak mai an ni a. Kan ram rohlu, nakin atana kan nghahfak, kan ram min la hruaitu turte an ni tih ngaihtuahna mit nena thlir phei chuan an mawina a zuala; an hmuhnawm ngawih ngawih mai.

Sipai, an ralthuam leh uniform famkim nena an han inthuam, kalrem hla nena an han parade thup thup mai hi an hmuhnawm thlawt bawk mai. Kan ram leh hnam humhimtu, thih pawh tih lova kan tana chhun leh zan thlu lova an hun hmang thintute an ni tih ngaihtuahna thinlung pu chunga thlir phei chuan an hmuhnawmna hian lung hial a tichhe thei nia.

Tlangval hrisel pangngai tana nula zei leh hmeltha tluka hmuhnawm thildang hi a vang duh khawp ang. Phuloh leh chan phak reng reng loh tur tih chiang rengte pawh hi an hmuhnawmna a nep chuang lova. Rilru ngaihtuahna an ti bing chuk chuka, suangtuahna ramah min hruailutin ‘hisap’ thui luat awm lek lova tisa chakna kaithotu an ni fo.

He hringnun khawvelah hian hmuhnawm leh mit ti tlaitu hi a van tam tehreng em ! Eng hi nge hmuhnawm kan tih ber thin le ? Mimal ngaihdan a hrang nuaihin a rinawm.

Hmanni lawk khan Bihari nu pakhat, dum leh hmelchhe berh ve tak, pawr chep chawp tak mai, in leh lo mumal pawh nei lova kawngsir leh hmun remchang apianga riak mai thin hian kawngsirah a fa sente, bawk lil lel, ring rek leh lu lawk ber maite hi duat tak maiin a lo pawm a. A khat tawkin a biangah leh hmuiah fawpin a en ngawih ngawih mai a. Lehkhakhawng them hian a zap dai hliau hliau bawka. Khawdang pawh hawisan rei thei lovin chu a naute chu enin a nuih leh ver ver thin. Chu nu che vel chu hmuhnawm ti angreng takin ka thlir deuh reng a.

FIREFOX TIHCHAK DAN

Technology  lam hriatna nei ve uk silo hian mi thuziah sa ka chhiar fuhte hi ka tuipui ve em em ringawt thin a ! Keima tuina mai bakah midang la hre velote hriat atan ka it ve bawk thin si avang hian  lo tangkaipuitu an awm ve mial takin tiin ka han chhawpchhuak leh a ni e.

Tun tum chu Mozilla Firefox hmangtute tan  1000000x time zeta tihchak dan in zir teh ang.

Hetiang hian han tih teh:

Step_1.  A hmasain i firefox kha han hawng la, address bar ah hei ziak rawh le,

"about:config"  enter hmet la. Thukhungna (“ ) hi ziah tel loh tur.

Warning a rawn lang anga, “I will be careful” tih kha click  ang che.

KASPERSKY INTERNET SECURITY 2011 : KUM KHAT FREE

Computer nei zawng zawngin kan buaipui leh kan mamawh zinga pakhat chu VIRUS laka inven leh kan Computer chhunga virus lo awmte tihhlum hi a ni awm e. Antivirus ah hian enge tha ber ang tih hi ka inzawh ve fo thin a ni a. Hman pawh hi ka hmang lawr viau thin reng a. KASPERSKY hi fak a hlawhin hmang pawh an tam a. Chutihrual erawh chuan keini ang mirethei tan chuan Trial bak kan hman theih siloh avang hian a hun a lo tawpa, kan mang a ang ruai zel thin a ni.

Kaspersky Internet Security 2011, kum khat activation free a hman theih dan Email hmanga ka subscribe website pakhat atangin ka hmu a. Ka han ti nghala, a that reuh em avangin midangte share ka it a, Facebook ah, (Mizo I.T.Helpline Group) ka post a. Hman ve duh si, a tihngaihna hrelo an lo awm chuan ka rilru a tih nawmloh em avangin hetah hian Mizotawngin (A ngialngana letling loving, kan hriatthiam dan awlsam zawk nia ka ngaihin) ka han dah tawp mai a ni.

Tin, he Software hi Pirate a ni lova, German Version a siam, a free-a an pekchhuah niin, tawng dang (English etc..) a lehlin theih tura tihdanglam mai a ni.

I han tan teh ang le ....

1. Hetah hian in register hmasa phawt rawh le.CLICK LA (German tawng vek anih avangin I browser in translate-na a pelo che anih pawhin a lem ka han tarlan hi a fillup dan tur a ni e. Tin a hnuaia check box hi tick vek la. Tichuan Registrienren kha i click dawn nia.) I in register hnuah Email pakhat i dawng anga, link a rawn pek click in i activate phawt ang. Tichuan License Key an rawn thawn leh ang che.

2. Hei click leh la,  HETAH HIAN check box kha tick la “Persönlichen Lizenzschlüssel anfordern oder verlängern” (A lem a, a chung zawk hi)ti chuan hei hi i click leh anga “Lizenzschlüssel anfordern”

3. Heta tang hian Kaspersky Trial download rawh le.hei hi click leh mai la MB 110 vel lai a ni a, i nghah peih a ngai maithei.

4. Heta tang hian heite hi download bawk rawh. 16KB chauh a ni thung.HEI HI

ZE THUP

Hmanni chu Mizo Blog directory atangin Mizo Blog hrang hrang ka keu kual vel a. Changkang, mawi leh chhawrnahawm tak takte an ni hlawm a. Mizoten hma kan sawn nasat tawh zia pholangtu pawimawh tak an niin ka hria a, lawmawm pawh ka ti. Blog nei an tam em avangin han len kim vek sen rual a ni lova, ka la leng kual zel mawlh ang.

Ka len kual velna a “Mak” ka tih ve deuh mai mai pakhat chu Blog tin deuh khan an sidebar ah About Me an dah a. Hetah hian ka lo ngaih ve mai mai dan chuan Blog neitu chanchin tawi a inziak turah ka ngai a. Inziak lo tawp chu awmlo mahse an blog tlawhtute tana a neitu han hmelhriat rei ruai theihna tur takngial pawh a awm hauhlo mai a. Mi awmlo inchhunga lenglut ang deuh duka inhriatnate pawh a awm dawn dawnin ka hria a. Blog neitu contact duh tan pawha inkharphui tlat mai engemaw zat an awm bawk. Vantlang chhiar leh tlawh theih tura kan inphochhuak a nih rau rau chuan inthup tit tet a ngai chuang em ni aw..tiin ka ngaihtuah zui ve mai mai a. Kawtthler lun lai takah Nawhchizuarin hmai khuh tlat chungin “Dawr theih ka ni e” tih lehkha ziak keng ta sela; chutiang deuh chu ni mai awm nite’n ka zuk hre rum rum a.

Kei roh hi, hriatna kawngka zim tak nei, thiam aia thiamloh ngah zawk ka nih avang hian ka ngaihdan hi a thing viau pawh a ni maithei tih phei chu ka dawn pha ve kur tho a. Ka ban phak ve ang tawk hnampui, tuipuiral-ho Blog te ka han lut ve rup rupa. Anni chuan an mahni kan hrechiang lovang tih hlau ni zawk awm hiala chiangin an chanchin leh nihna an lo tarlang kiau kuau bawk si a. Mahse ka banphak a tawia, ka len velna ram a zim em a, “Sapho pawhin an ti a..” ti tur khawpa chiang ka ni hauhlo tih ka phalo e. 

Facebook lamah han lenglut ila, kan thiante ngei ngei pawh nula nge an nih NU, tlangval nge PA hriat theih reng reng lova inthup tlat mai enge maw zat an han awm tlat maite hian ngaihtuahna thui lemlo chu mi a siam chiang alawm.

Kei misual, lungmawl ve mai mai hian ZE THUP hnam ang dawn dawnin kan hnam hi ka zuk hmuh phah ti tuai dawn ta mai a. Ka rilru a vak thui zel a, Ze thup hmang kan nih zia tanchhan tur ka han dap chiam mai pek a. Han zawn takah chuan alo tam thei hrep mai lo niin. A langsar zual ni a ka hriat pahnih khat lek tarlan ka duh a.

A bul tanna atan....

Mi fate chuan Internet leh Computer lamah thiamna sang pui pui an nei a. Website leh Blog chhuanawm tak tak an nei hlawm tih ka hria. Kei akarin hetia Blog kan siam ve ngawt mai hi ka thiamna leh finnaten a phak velo tih ka hria a, miin an ti thin tih ka hriat avangin ka han ti ve chawih mai a ni. Enge maw zawng tak chuan zahthlak te pawh ka ti deuh.

Mi han rawn tur ka nei ve lem lova, mi blog te ka bih kual vak vaka, risk takmeuhin ti hian ka han chhuah ve phawng mai a ni e. Min nuih duh tan chuan ka nuihzatthlak ngawt ang le ! Phak tawk ala ni rih miau si a.

Khawhar hnem atan, kei leh ka chhungte leh thiante tan.... Suangtuahna leh rilrua awmte leih buak hawk hawkna atan. A tul dan ang zela hman chhoh bawrh bawrh atan nise.

He blog hi ilo chhiar palh hlauh anih pawhin, min nuihzat viau anih chuan min nuih nghek la. Thurawn erawh chu i theih ang angin min pe ve dawn nia aw.

Ka Blog hming VOILA hi a awmzia i ngaihtuah maithei, chhut buai duh suh kei ngei pawh hian a awmzia ka hre bik lemlo a nia. Ka engkimah hian he hming hi ka hmang thin....

Ka lawm e.