Tawngtaina

Pathian hnena ka tawngtai hian min tih hlawhtlin sak ngeia ka rin, chhan awm hliah hliaha ka rinah te hian chhanna ka hmulo fo thina. Ho lam leh nuihzatthlak zawk hiala ka lo ngaih thinah te hian min chhang leh khurh roh lawi thin si a; kan Pathian hi Pathian MAK tak ani tih hi a chiang ngawt mai.

Parva – II a ka awm dawn khan nupui fanaute nena kal a rem chiahloh avangin tumloh deuhin hmelhriat leh laina pawh kan neihlohna Lungleiah hmanhmawh baklengin in luah tur kan zawnga, kan invawm lut rawk rawka, ka liam san ta mai kha a ni a. Ngaihtuah nak alaiin mumang thalo deuh deuh man ka ching thina. Nileng maia ka mumang avanga awm nawmloh changte kha ka nei thin. Mumang thalo laka min veng tura Pathian dil hi naupang tawngtaina awm deuhah ka lo ngai  mai thina. Nimahsela, ka lo mamawh hle ani tih hriain, “Lalpa, mumang thalo lakah min veng ang che” tih chu ka zan mut dawn tawngtaina thupui zinga pakhat ani chho ta a. “Mumang tur thleng thleng chuan min tibuai teh suh, a tak tak pawh ni hleilo” min tih san miah lova ka mamawh min hriat saktu Pathian hi a tha ka va ti em  !!

Nikum(2011) Khagaria kan awmlai khan tlai khat chu kan member nu pakhat hi tap deuh pur hian alo kal a. An Bawngpui rai lai a pum chhungah a note a thi a, a note a hram tawh si a, a hring chhuak thei silo. Vety Doctor an pun pawhin tihngaihna a hriat sak tawh lova, tawngtai sak turin min rawn ko hi alo ni a. Ka thawhpui, a rammi nen chuan kan insiama “Bawngpui han tawngtai dawn chu leh” tiin ka nuih a za tlat mai a. “Awmlo” riaua hriatna hi ka nei tlat a !! 

Kan va thleng chu an kawtah Bawngpui chu an lo thlunga, a lo chau tawh khawp maia. Mi enge maw zat hian an lo en thap maia. Bawngpui bulah chuan kan thiandun chuan kan ding ran maia; ka nuih a za tawh miahlo. Hlauhthawnna hian ka khat tlat thunga. Ringlo mi tam takin min thlir thup mai si a, kan tawngtai anga, Bawngpui chu a thi leh roh si anga kan Pathian hi an hmusit zual sauh dawn anih hi tiin ka zam ru em em a ni. Kan tawngtai ta a, ka thianpa chu ring takin tihtak zetin a tawngtai lauh lauh a. Ka tawngtai hlei theilo, “Lalpa i mualpho dawn a nia aw....Bawngpui hi a thih vaih chuan i mualpho ngei ngei ang”  ka ti mawlh mawlh ringawt a. ‘Amen’ hnuah pawh han ngaihthatpui tur ikhaw a awm bawk silo, ngui burin kan hawng ta a. Zankhuain rilru a nuamlo in min kap run reng maia. A tuk dar 11 velah Bawngpui neitunu ngei mai chu alo lang leh ta. “Nichin deuh khan a note chu a hring ta asin” a rawn ti ta mai. Ekhai  !! patling hi ka va han lawm tak em aw.....!!  

Kan Pathian hian mualpho alo  duh reng reng lo a, a mualpho ngai dawn bawklo ani. Amah chawimawia a awmna tur chuan Bawngpui damlo pawh hmanraw tangkaiah a hmang duh alo ni reng mai.