KA TAP LO

Mizo chhiar danah chuan, “Kumchhir” a piang kan ni a. Thla 19 zet kan inkarah a tla thung. Naupan tet atanga  phir ang maia enkawl kan ni a. Kan taksa a intiat rual a, kan thilneih leh thawmhnaw pawh a inang chiah chiah zela lei sak thin kan ni. Phir emaw ti a min haitu an tam thin khawp mai.

                        
Kan naupan lai chuan ka banah hian min kai thin a, a nau ka nih avangin mi a duata; min len pui fo thin. Zanah Pawnto turin kan chhuak a, thimtham zinga keimaha ka haw ngam loh avangin mi a haw san ngailo.

                        
Naupang a tak ka nih avangin pawnto-naah leh in Selem chaih nikhuaah te hian thiante tih duhloh thil tam tak ka ti thin a. Min zahpui avangte leh mi a khawngaih avangtein mi a velh leh hauh chang a awm bawk thin.

                       
Vawikhat chu na tak tuarin, thih ngam hial khawpin ka damlo a. Ka bula englai pawha awm duh mahse School kal a ngaih thin avangin hrehawm a ti em em a, School ban veleh chak takin a rawn tlan hawnga, ka bulah ngawi rengin a thu a, a chang chuan mi a mutpui bawk thin. Khawlai len nuam a ti ngai lova, a len chang pawhin reilote ah alo hawng leh vat a, ka bulah ngawi rengin a awm thin a ni.

                        
A rilru a chak lova, lehkha a thiam thei lem lo. A zir taimak em avangin a thiamlo pawlah erawh a awm ngailo thung. Pawl inang reng zir kan ni a, ka zir thatchhiat thin zia a hria a. Kan pawla pakhatna ka ni thinte chu mak a ti em em thin a ni.

                        
Rilru dawih tak mai a ni a, mi pawi a sawi ngailoin tumah a sual ve ngailo. Kei erawhchu mi kawlhsen tak mai leh thiante nena insual hrat tak mai ka ni a. Thiante nena kan insual changin an U ten an chhana, min velh chang a awm thin. Chhantu ‘U’ neilo ang maia mi u-te velh ka tawrh chang a hrehawm a tih thin ziate kha aw ! Midangte tibuai turin amah ah khan ze sual a awm ve mawlh silo a ni.

                        
Miin an tihbuai luih tlat tum hnih erawh ka hria a. A ni chu a dan pangngaiin a ngawi reng a. A thiam thu pawh a sawi ve chuang reng renglo. A ngawih tlat zel avang hian an zuam thin si a. Ka thin hian a tuar ve silo. Amah  sual tumtu-te chu keima thuin ka sual hmiah mai a, ka u a ni a, ka chhan ngai khawpin dawihzeplo mahse chhan ka duh thin. Ama’rawhchu a ngaihdan leh duhdan a nih loh avangin mi a velh phah leh si a.;

                        
Kut mi thlak a hreh em em a, keimah zawk hian hlaulo leh zahlo taka ka tih fo thin avangin mi a velh phah fo thin. Na lo tea kut mi a thlak chang pawhin uar em emin ka tap thin.Kut mi a thlak anih hrim hrim chuan ka tan chuan ‘A na’ a ni mai.

                        
Na vakloah pawh ring leh uar taka tah vak mai ching ka ni a. Ani erawh hi chu a tap khat em em a. A tap ka hre tamlo hle. Ka tap min thlem chang pawhin, “A nat viau loh chuan tah miah loh tur” tiin taplo turin min thlem thin.

                        
Vawikhat chu Damvenga ka pite inah kan leng a. Kan hawng lam chu kan unauin hlim takin kut insuih rialin kan kal a. Chutihlai chuan kan rual u deuh, sual tak mai leh kan hlauh ruk em em thin chuan mau a mi vuak tumin min um chiam mai a. Keini aia lian leh chak zawk anih avangin min umpha thuaia. Ka u chu a lu ah a rawn vaw chawrh mai a. A thu hnawk a, a lu a dawm vawng vawng a. Mahse a tap lo. Ka thin a rim em em a, tah vak mai ka duh a. Mahse ka u chu a tap lova, mi a hau bawk silo, ka engmah a nat siloh avangin ka tap ngam lo. Ka khawngaih em avangin ka mittui a tla zawih zawih a, mahse ka tap lo !

                        
Thinur hmel pawh a pu chuang lova, a lu chu a pem deuh a, thisen tlem a chhuak a. A rawn thova, ngawi rengin ka banah a vuana, min kai a, ka nu leh pate hnena sawi miah loh tur a tih avangin kei a nau tawng thei tak hian vawiin thlengin ka la sawi ri reng reng lo.

                        
A kut a hmui em em a, sava a perh thla thei hle. Dai hnaia sava veha vah rek rek chu a nuam tih zawng ber a ni a. Sava za tam a perh thlain a awk thin. Chutihlaiin kei a nau ve em hi chuan kutzungtanga chhiar tham pawh ka perh thla ve lo.

                        
Aizawl-ah ka pain a zinpui a, kei chu kan khaw thenawm khaw tereuhte-ah ka zin ve thunga. Ka zinna chanchin sawi tur tam tak, sawi sen loh ka neih laiin ani chuan Aizawl chanchin mi hrilh tur a hre tlem em em mai a. Ngaihnawm ti takin ka zin report a ngaithla dauh dauh thin. Naupang nungchang tha tak a nih avangin ka pu khan a duat thei em em a. Tumahin an kohpui ve miahloh hmingin “Buanga” tiin a ko thin a. A rukin ka thik thin hle a ni.

                      
Meizial zuk ruk kan ching chho tanin rawlthar rim kan nam chho tan a. Thil thalo, nu leh pate phalloh thiltih a nuam tan a. Ka u nen hian nu leh pate bulah a inhek zawng leh zualko zawngin engmah kan sawi ngailo.

                        
Ka u chuan amah aia upate kawm a ching tan a. Zawi zawiin mi a thlahthlam hret hret a. Mi a tlangval san titih ta mai a, a tirah chuan hrethiam lovin a hrehawm tihna deuh ka nei.

                        
Lehkha zir lam a mir vakloh avangin High School kum khat a zir hnuah Aizawlah Puanthui a zir ta a. A tui bawka, a thiam ta phian a, eizawnna tlak khawpin a thiam chho ta a. Amah pawhin nuam a ti em em a ni.

                        
Tlangval lerh a nih lem loh avangin ngaihzawng mumal tak a neih ka hre tam lova. Tlangval hmeltha tak a nih avangin nulaten an duh thei hle tih erawh chu ka hria. Naupangtein nupui neih a duh thuai a. Nula fel tak, amah hmangaih em emtu Nurse a tawng a, an innei zui ta a ni.

Puanthui zirin Aizawl-ah  (1986)

                        
Tawng tamlo tak thin kha zawi zawiin a tawng duh chho a, a tlangval chhuah hian tawng duh taka sawi tur nilo mahse thiante chawkhlim thiam, fiamthu duh em em mai a ni a. A thiante pawhin an ngainain a bula awm nuam an ti em em thin a ni.

Zu han in zeuh zeuh a chin chu a nupui neih hnuah pawh a sim chuang lova. An nu hna avangin Aizawlah transfer an ni a. A puanthui thiam pawh chu chhawr tangkai hlei thei lovin, nau awm leh innghah a lo tul ta a. Nupui hlawh nei a lo ni bawk nen zu pawh a in ngun ta viau reng a. Chhungte zilh leh hauh pawh a tuar ta zauh zauh reng a ni.

                        
Zu a ruih changte hian miin a bula awm nuam an ti zawk emaw tih mai tur hian mite a chawk hlim thiam hle thin a. Ruih avanga buaina siam zawngin a awm ve ngai reng reng lo.

                        
Tumkhat chu a thianpa nen zu an rui a. Kawnga rui chunga an kal lai chuan Police Mobile Motor hian a rawn tlan lehpel a. Anni zu rui ta chuan an lo “bye bye” khanglang a ni awm e. Police te chuan an man zui ta a, lockup-ah an hreng ta a. Cheng zanga chawia inkhul chhuah a ngai a. A nupui a phone a, “ Hei bye bye case in kan tanga, khulh chhuah kan ngai e” tiin. A fiamthu duhna hian thinurna tur tam takah pawh mi a ti nui zawk fo thin a ni.

                        
Thangkura Drama Party-ah hian part time-in rei vaklo a tel ve a. Mi lawm a hlawh thin viau a ni awm e. Nimahsela, khaw hrang hranga zinkual a ngaih thin avangin an chhungkaw khawsak nen a inmil chiah lova a hriat avangin a bansan leh thuai a. A bansan chhan a thianten an zawhin, “Thangkura ti MAK tu ber ka nia, ka hlawh a tlem ber si a, ka bang mai” a ti khauh thin a. A pawisa hlawhchhuah a lungkham vang ni lovin a fiamthu duh vang a ni. Nupui sawrkar hna thawk nei ta chu an nupa a an infiamna lama a tawngkam pakhat, “I hlawh hmangin ka chawm che a, I vannei ngawt mai” a tih phei chu Thangkura hian thawkkhat lai khan a vawrh lar viau a ni.

                        
Zingkar muttui lai takin kan nuin min rawn sawi harh a, “Tho teh, u Vala ruang an char a ni awm e”

                        
Ka lu hi a hai chu a ni lo. Ka vir muai muai niin ka hria a, nun hi a chawmawlh mulh mai a. Ngaihtuahna a fim lova, ka thu tawp a.Ka tawngtai thei lova, ka tum chuang bawk lova. Ka buai nuaih lova, ka fim kar chuang heklo. Engmah ka hrereng tawh hauh lo.

                        
Taxi in kan tlan a, an veng leh an in bul velte chu a lo la reh thap a. Mithi nei awm hmel ka hmuh loh avangin ‘Thuthang diklo kan dawng a nih ngei hi’ tiin duhthusam ngaihtuahna a lo lut a.

A ngaihsan em em Laldenga thlanah

Ka thauah hian min thama min man bet tlattu hi a awm a,.ka khur ru der der a. Aw ! ka va’n zam nasa tehlul em ! Inti huaisen ve thin tak thinlung hi hlauhna avangin a phu dawt dawt mai si anih hi.

                        
Inchhung kan va lut a. Ka u chu… ka u ngei mai chu khumah amah chauhin a lo mu a……..

                        
Nimin tlai khan a leng chhuak a, a hawng turin Venglaia ka nite in pawh a tlawh a. Zu chu a in ngei a, a dan pangngaiin rui chhia a nilo.

                        
Bawlhhlawh paihna kham mawngah a ruang chu zingkarah hmuh a ni a. An in atanga hla loteah a ni. Bawlhhlawh paihna kawng sira mi pakhat nen an thu dun lai chu miten a damlai hmel an hmuh hnuhnun ber a ni ta a ni. He mi pakhat hi tunge a nih kan hre dawn tawhlo kumkhua pawh a ni mahna ..!

                        
Mite pawi sawi hlau em em thintu ka U..mite nun chawkhlim thintu khan mi nunrawng kut a tuar ta em ni ?

                        
Engatinge he khawvelah hian mi nunnem leh zaidam, mi nun tluang leh thate nun hi a tawi tlat zel le ? Unau zingah pawh hian a sual leh fellote thih hmasak tur ni sela a thi hmasa tur zawk chu keimah hi ka ni a sin !

                        
Ka u chu khumah ngawi rengin a mu a, na tak a tuar a ni. Engmah sawi tur ka hre lo. Tah vak vak ka duh a, ka tap silo. Ka u chu a tap lova, a ngawi reng a. Min hau lova, ka taksa ah na ka tuar bawk silo. Ka mittui a tla zawih zawih a, mahse ka tap lo. Nakinah a rawn tho anga, ka banah min kai anga, “Sena, hawng ang. Ka nu leh pate hnenah engmah sawi suh aw” a rawn ti leh mai dawn a ni.

                        
Ka u hian tun tum chu na a ti hle a nih dawn hi, a rawn tho har em mai. Aw.. ka thinlung hi a na vawng vawng a. PHUBA……he thumal hian ka thinlunga hmun pakhat hi a luah ta reng mai chu a ni a.

                        
Hmanah kha chuan miin an sual pawhin a sual let ve ngai lova, amah chhan nan ka tha ka thawh thin kha a ni a. Tunah hian chhan duh mah ila chhan dan tur ka va’n hrelo em.Tha tawh dan trur ka hre hauhlo mai. Kei i nau laktlak loh tak hian “Ka chhan theilo che a ni”.

                        
Rilru na taka ka thlir vawng vawng lai chuan a ruang dai riai tawh chu kuangah an zalh a, an chhin hnan ta. He khawvelah hian a lo tho tawh dawn reng renglo, kan inhmu ngai tawh dawn lo.

                        
Tunah chuan ka u hi a thi ani tih pawm duhlo mah ila ka pawm a ngai  ta. Hun leh kumte an vei ve zela, ka pawm thiam tawlh tawlh a. Midang tumahin kan kohpui ve miah loh ka fapa “Mampui” ti a a koh thin pawh Amah avangin “Mampui” tiin kan ko ta.

                        
“Ka u, ka ngai em em thin che tih hi tuma hnenah ka la sawi ngailo. Sawi ila chuan ka tap dawn a sin ! Lo tho leh la, min hau la… na lotein min beng la, tichuan ka TAP ang, ring takin ka tap vak vak ang !!

                        
“Ka ngaih thin em che avang hian ka mittui hi a tla fo thin a..Mahse ka tap ngai miahlo asin. He thu ka ziah laite hian ka mittui hi a tla renga, mahse ziah ka duh si a. Ka ziahlai hian ka bulah i awm tlat te hian ka hria a…."