CHANCHINTHA THILTIHTHEIHNA

Synod Mission Board hnuaia Mission Field hrang hrangah Chanchintha thiltihtheihna avanga Thlaraubo chhanchhuaha an awm zel chanchin han hriat thin hi a ngaihnawmin a va’n ropui thin tak em ! Missionary te inpekna tlawm tak Pathianin a ropuina puanchhuahna hmanraw tangkai taka a la hman zel avang hian kan rawngbawlna hi Lalpan a pawma, mal a sawm ngei a ni tih hre thar lehin tan ila zel ang u.

Chanchintha thiltihtheihna ropui tak zinga pakhat Karbi Anglong Field, Sarihajan Pastor Biala Upper Dillai khua a lo thleng mek chungchang tawitein i’n tarlang teh ang.

Upper Dillai khua hi khaw lianlo tak a ni a. Kum 2008 kum tawp lam khan Kristian chhungkaw pahnih lek awmin Fellowship din a ni a. Sarihajan Compound a Missionary-ten Biakin, Maurap hmangin an sak saka. Beisei angin Kristian an pung mawh angreng hle a, khawhar takin hemite chhungkaw hnih hian an Biakin tlawm tak chu an luahlum ve hram hram zel a ni. Kum 2009 kum tawp lam hnaih khan an khua a damlo, pa pakhat  Rupsing Timung chu a taksa pangkhing zeng natna in a man a, che theilo leh mangang em emin a awm a. Natna khirh tak a vei lai chuan Lal Isua mamawhna lian tak a nei a ni tih a inhre ta a. Tichuan Kristianah a inpe ta a. Mak tak main Kristiana a luh atangin a natna zawng zawng chu a dam ta viah mai a. Hna rum tak tak pawh thawk leh theiin a dam ta viah mai a ni.

He thil thleng MAK tak mai hian ringlote hnenah nasa takin thu a sawiin Lal Isua chu ‘Tunge a nih ?’ hriatchian lehzual chakna an lo nei ta a.

Hetih mek lai hian mipa naupang pakhat a hming Sarhon Bey chu panchhiain a taksa pumpui mai a bawm khat veka, dam leh tura beisei bo tawh tak mai niin a nu leh paten Kristianah an rawn luhpui rawih mai bawk a. Reiloteah a panchhiate chu an lo hil nghal ta duak duak mai a, a vun pan liai luai tawh chu vun thara rawn inthlakin damna a chang zui ta a ni.

Lal Isua thiltihtheihna chuan ram la zelin. Mi mangang leh beidawngte hnenah Chanchintha thiltihtheihna chu puanchhuahin a awm zel a. Pitar pakhat, Kareng Teronpi pawh hun rei tak natna tuarin a khumbet tawh a. Lal Isua tihdamna beiseiin Kristianah an nupain an lut ta rawih mai a. Mak tak maiin Bialtu Pastor, Rev. R.Lalthapuian Baptisma a chantir laiin che theiloa a mu hlawm reng lai chu a rawn tho ta mai a. Damna a chang zui ta a ni.

Tunah hian Kohhran In 8 lai an lo tling ta a, member pawh 36 zet an ni ta mai. A va ropui em ! He Upper Dillai khuaah hian Lalpan a Chanchintha Thiltihtheihna chu a puangchhuak mek zel a. Kohhran duhawm tak a lo la piang chhuak ngei ang tih a rinawm hle.

Tanpui an ngai : Upper Dillai Kohhranhote hi an hlim em em a, an hmel hmuh a nuamin an inlungrualnate chuan thinlung a khawih hle a ni. Chutihlaiin tanpui erawh an ngai em em. Tawngtaipuina tam zawk leh sum leh paia tanpui an mamawh.

An Biakin, Missionary ten an sak sak, tlabal tawh takah chuan lungawi takin Inkhawm thin mahse; he an Biakin hian rei a daih tawh dawnlo. Tin, thutna atan Mau pum ram khawm hman a ni a, Pulpit an nei lova. Maicham atan leh Lectern atan mau dap leh phelsep remkhawm an hmang mek bawk.

Lalpa hmangaihte, hlim leh lungawi taka an inkhawmna Biakbuk hian sak that emaw thuam that emaw a va’n mamawh tak em ! Nang leh Kei, Lalpa hmangaihna changa, a malsawmna chen mektute hian MAWHPHURHNA kan neiin I hre ve lo maw ??