Kan thupui atan KRISTA LEHKHA tih thu hi ka’n thlang a. Lehkha han tih ngawt mai hian a fiah zolo deuh maithei a. A tawngbul leh Grik emaw, Hebrai tawng emaw hre ve se su lo mah ila. He chang hian a tum tak zawk ni a lang (English Bible kan en chuan) chu, Lehkha satliah mai ni lovin. Lehkhathawn (A letter from Christ) niin a lang a. Chuvangin Lehkha kan tih hian Lehkhathawn kan sawina a ni tih chiang tlang ta ila a tha awm e.
Awle, Kristian, Ringtu zawng zawngte hi Krista Lehkha mitinin an chhiar leh an thlir, Pathian Nung Thlarauvin a ziahte kan ni a. Fakna hla siamtu chuan, “Miten min chhiar, min thlir reng e,.....” tiin alo phuah a. Chuvang chuan ringtute hi khawvel mite awm anga awm ve mai mai thei kan lo ni hauhlo a ni. Paula chuan, “Engpawhnisela, in awm dan chu Krista chanchin tha nen inmawi phawt rawhse” (Phil.1:27) alo ti a. Kan awmdan tinreng mai hi Kristian awm dan tur a ni em ? ti a mahni theuh kan inbih chian fo a tul hle a ni.
Tichuan, keiniho hi Krista lehkhathawnte chu kan ni a. Lehkhathawn kan nihna ah kan tihtur leh kan mawhphurhnate tawitein i han tarlang teh ang.
1. LEHKHATHAWN CHU THAWN CHHUAH A NI : Lehkhathawn chu a thawntu, a neituin a thawn chhuak thin a ni, A thawn chhuah loh chuan lehkhathawn a ni theilo. Ziak sa, envelope-a khung fel diam tawh pawh thawn chhuah a nihloh chuan Lehkhathawn a ni theilo a ni.
Nang leh kei hi Krista lehkha, Pathian Nung Thlarauin a ziah leh a thawn chhuahte kan ni a. Khawvel zawng zawng kala chanchintha hril tura a thawn chhuahte chu kan ni. Paula chuan, “Krista hmangaihna chuan mi tir lui a ni” ati a. “Tih makmawh ka chungah a innghat a ni” te a ti a. Chu mai chu duhtawk lovin, “Chanchin tha hi hril suh ila, ka chung a pik dawn si a” a ti hial a. Keini hi chanchin tha kan hril loh avanga chung pik inti ka awm em le ?
Thawnchhuah han tih hian Missionary ah kal vek tur tihna lam a kawk ber awm lo ve. Hla taka thawnchhuah an awm laiin hnaite a thawn chhuahte pawh an awm bawk. ‘Kei hi khawi hmunah nge min thawnchhuah ve le ?’ ti a kan in enfo a tul. Chhungkuaa a thawn chhuahte, thenawm khawveng hnena a thawn chhuah te, tin, kan vela ringlote hnena a thawnchhuahte pawh kan lo ni mai thei a ni.
2. LEHKHATHAWN CHU PALAI A NI : Lehkhathawn chuan palai hna a thawk thin. Awmna hmun a hlat avangte, awmna in a zirloh avangtein leh tawngkama sawi a remlohna ahte lehkhathawn hmangin thu kan inhlan tawn thin. Lehkhaah kan sawi duh zawng kan ziak a, chu lehkha chuan kan sawi ai min sawi sak thin, chu chu Palai hna a ni.
Lal Isua chu lei leh van inrem tawhlo karah palai hna thawkin he khawvelah hian a lo kal a. Amah avangin lei leh van lo inremin Chatuan mi kan lo nih theih phah a ni. Amah chu remna palai a ni a. “Krista aia palai chu kan ni” Paula’n a lo tih ang khan. Keini ho hi Krista thuhretu, palai atana a thawnchhuahte kan ni a. Krista leh amah la hrelote inremtir tura palai hna thawk mekte kan ni.
Paula vek hian, “Dawhthei taka zirtir chungin an thiamloh hriattir la, zilh la, fuih rawh....” a lo ti a. “Nang erawhchu engkimah fimkhur la, hrehawm tuar la, i rawngbawlna kha hlen rawh” a tih zawm zel a. Paula Strategy hi a van ropui em ! Palai hna hi dawhtheihna nen kan thawh a ngai.
3. LEHKHATHAWNAH CHUAN A THAWNTU CHANCHIN A INZIAK THIN :
Lehkhathawntu chuan ama chanchin a ziak thin. Keini pawh hi Krista lehkhathawn, Pathian Nung Thlarauin a ziahte kan ni a. Keimahni ah hian Krista chanchin chu mawi takin a inziak tur a ni., Keimahah hian keima chanchin pawh a inziak tur a nilo.Mahni chanchin sawi tur pawh kan lo nilo. Keimahah hian miten enge an hmuh thin le ? Krista chanchin an hmu em ? Chhiar tur keimahah hian enge awm ? Krista zia ni reng renglo hi keimahniah hian a va’n inziak hnem thin em !
Thenkhat chu lehkhathawn zawr chhe tak, tet deuh phing pheng tawh, kum hmasa lama ziah tawh kekawr ipte a ah, suk hnan hrep tawh, chhiar hleih theih tawhlohte kan ni awm e. Then khat chu ziak sin lutuk, chhiar har tak, sipel chawp fe ngaite pawh kan ni ang.
Habakuka hnena Pathian thu lo thleng chuan, “Inlarna chu ziak la, a chhiartuin tlan paha a chhiar theih khawpa chiangin lungphek chungah ziak rawh” a ti a.
Signboard ziak hraw tak tak Highway sirahte kan hmu thin. Motora chak taka tlan pawha chhiar theih tura ziak hrawte an ni. Vawiina ringtute hi khawvel mi kan tih, kan bula ringlo mite hian tlan chungin min chhiar a ni. Kan nun dan tinrengte hi min chik a, kristian awmdan leh nungchang atanga hmuh tur leh zir tur an hmuh loh chuan Lal Isua tan kan sengkhawm thei ngai lovang.
Krista Hawrawpte kan ni a, he hawrawp hi Hawrawppui(Capital Letter) ani tur a ni. Kristian tinte hi HAWRAWPPUI KRISTIAN ni theuh turin ka inchah duh a ni. Chhiar awlsam, Biakin leh Inkhawmpui nikhua chauha chhiar theih nilo, englaipawha chhiar theih kan ni turni.
Keimahni ah hian thu lawilo mai mai a inziaklo. Krista chanchin mawi takin; Hawrawppui ngatin a inziak zawk a. Chu chu kan hmelmapa hian nawhreh tumin Duster lianpui kengin min chang reng thin a ni. Chu Krista chanchin mawi tak chu han nawhreh duak duak a, a aiah duhamnate, chaponate, luhlulnate, eirukna leh hlemhletnate..etc. han ziah daih mai hi a chak zawng tak a ni.
Sadhu Sundar Singh-a chanchin tawite han zeh tel lawk ka duh a. ‘Vawi khat chu Sadhu Sundar Singh-a kha sap inah a leng dawna,kawngkaah chhiahhlawhin a lo dawng sawnga. A pi hnenah, “Ka pi mi poakhat a lo leng dawna, a hming a sawi chu ka lam thiam tawh lo. Mahse Isua a ang khawp mai” a ti.
Awle, Krista lehkhathawn a rawng bawla, palai hna thawk tura a thawnchhuah keimahniah hian miten Krista chanchin mawi an lo hmuh a, lawmna hla an lo sak theihnan. Keini ho hi Krista rawngbawltu-ah leh Pathian thuruk enkawltu-ah miin min ngai rawh se.
Lalpan a thu malsawm rawh se. AMEN.
3 comments:
Tha dap2 hle mai, Sermon nung tak a ni e.
I sawifiah thiamin a chiang fek fawk hle mai. Pathian thu, chona tha tak ani e. Good post.
He Sermon hi Kum 2001-a Mizoram chhimthlang tawp Parva-II a ka awm laia Pathian min pek a ni a. Hmun hrang hrangah awm kualin tawn hrang hrang ka han nei a.Hawrawppui Kristian nih ngam hi a chang chuan a HARSA dawn a ni tih ka hmu thinin ka hria.
Lalpa'n ropuina chang mawlh rawh se.
Post a Comment