ZE THUP

Hmanni chu Mizo Blog directory atangin Mizo Blog hrang hrang ka keu kual vel a. Changkang, mawi leh chhawrnahawm tak takte an ni hlawm a. Mizoten hma kan sawn nasat tawh zia pholangtu pawimawh tak an niin ka hria a, lawmawm pawh ka ti. Blog nei an tam em avangin han len kim vek sen rual a ni lova, ka la leng kual zel mawlh ang.

Ka len kual velna a “Mak” ka tih ve deuh mai mai pakhat chu Blog tin deuh khan an sidebar ah About Me an dah a. Hetah hian ka lo ngaih ve mai mai dan chuan Blog neitu chanchin tawi a inziak turah ka ngai a. Inziak lo tawp chu awmlo mahse an blog tlawhtute tana a neitu han hmelhriat rei ruai theihna tur takngial pawh a awm hauhlo mai a. Mi awmlo inchhunga lenglut ang deuh duka inhriatnate pawh a awm dawn dawnin ka hria a. Blog neitu contact duh tan pawha inkharphui tlat mai engemaw zat an awm bawk. Vantlang chhiar leh tlawh theih tura kan inphochhuak a nih rau rau chuan inthup tit tet a ngai chuang em ni aw..tiin ka ngaihtuah zui ve mai mai a. Kawtthler lun lai takah Nawhchizuarin hmai khuh tlat chungin “Dawr theih ka ni e” tih lehkha ziak keng ta sela; chutiang deuh chu ni mai awm nite’n ka zuk hre rum rum a.

Kei roh hi, hriatna kawngka zim tak nei, thiam aia thiamloh ngah zawk ka nih avang hian ka ngaihdan hi a thing viau pawh a ni maithei tih phei chu ka dawn pha ve kur tho a. Ka ban phak ve ang tawk hnampui, tuipuiral-ho Blog te ka han lut ve rup rupa. Anni chuan an mahni kan hrechiang lovang tih hlau ni zawk awm hiala chiangin an chanchin leh nihna an lo tarlang kiau kuau bawk si a. Mahse ka banphak a tawia, ka len velna ram a zim em a, “Sapho pawhin an ti a..” ti tur khawpa chiang ka ni hauhlo tih ka phalo e. 

Facebook lamah han lenglut ila, kan thiante ngei ngei pawh nula nge an nih NU, tlangval nge PA hriat theih reng reng lova inthup tlat mai enge maw zat an han awm tlat maite hian ngaihtuahna thui lemlo chu mi a siam chiang alawm.

Kei misual, lungmawl ve mai mai hian ZE THUP hnam ang dawn dawnin kan hnam hi ka zuk hmuh phah ti tuai dawn ta mai a. Ka rilru a vak thui zel a, Ze thup hmang kan nih zia tanchhan tur ka han dap chiam mai pek a. Han zawn takah chuan alo tam thei hrep mai lo niin. A langsar zual ni a ka hriat pahnih khat lek tarlan ka duh a.

Kan nulate hian an zia hi an lo va’n thup nasa thin em aw ka ti. Ka dem hauhlo na a, kan ram leh hnam kalsiam a khawih phak tlat nite’n ka hre ve a. Kan hnamzia ah reng hian mipain nula kan rim ang hian nulain tlangval rim thu awm miau silo chu, awmhmunah lo in tih duhawm hle kha an tihtur a ni ber mai a. Mipate mit la leh hip thei ber tur ni a an hriat nungchang leh zia, an pianpui ni reng renglo hmang khan an han inla bawih ta hnap mai thin a nia ! Chu ze-thup zia, lemchang nun chuan mipa thinlung hi a ti kehsawm ta mai thin a nih chu. Hetih hunlai na na na hi chuan Hollywood tuala phochhuah tlak khawp lemchang nun an nei chiang a ni.

Mipate pawh hi kan lo bang bik hauhlo mai a. Nulaten ‘pa deuh hrak’ an ngaisang ni a kan han hriat chuan kan han inla Rambo thei mai a. Korean thlipui avanga kan nulate ngaihsan inthlak ta deuh ni a ngaiin kan incheina leh ka zia zawng zawng kan han ti nem deuh hlui hreh lemlo bawk nen.Two wheeler ngaisang ni a kan hriat chuan thenawmte helmet keng chunga nula rim hreh miahlote pawh kan lo awm ve leh zel a.

Ni, chutiang ang ze thup thinte chu pawnlam lang thei zia inhiptawnna avangin kan han innei ta lawp lawp mai a. Inneihna ah lem a chan theih tawh miau siloh avangin hun reiloteah kan zia tak tak lo langchhuakin, “Ka rin ilo anglo” kan inti tawna, inthenna, fahrah siamna a thlena, kan ramin a tuar ta thin a nih hi.

Kan Kristiannaah hlei hlei hian he lemchang nun, ze thup nun hi kan va phochhuak nasa thin tak em ! Buh lem leh a tak chu to za tur chu kan ni meuh mai a. Buhlem hi buhtak dip ral vek khawpin a thangduang ang tih a hlauhawm ka ti.

“Hmel a siam theihloh a, nungchang erawh chu a siam theih” an ti a. Kan pu Vanapa khan alo lan chiantir khawp mai. Tunah zawng, kan hmel nen lam hian kan thup zo ta !!