Thinlung Bawng-In

“Isu vawiinah hian kan thinlung bawnginah,

Lo piangthar leh la nang, kan chatuan Lal turin…”

Mizo Kristiante thinlungah hian Lal Isua pianna hmun kan mitthla apianga lo lang thin chu Bawngin leh ranchaw pekna thleng hi a ni awm e. ‘Ranchaw pekna thleng’ han tih pawh hian kan mitthla a lo lang thin  chu ‘Vawkchaw kuang’ hi a ni tam berin ka’n ring ringawt bawk a. Kan hlaphuah thiamten thuk tak maia kan rilrua min lo tuh ngheh sak tawh a nih avang hian Bible sawi aimah hian kan rilruah a fiah zawk hial awm a nia !

Kan urlawk mek, kan nghahhlelh em em Krismas lo thleng tur hi eng ang thinlung puin nge kan hmuah meka, hman kan tum le ? A chunga hla tlar hnih lek ka han tarlan hla khi thinlung takin kan sain kan lampui ngam chiah tak tak em ? Thinlung tlawm, Lal Isua pianna tlak thinlung neiin kan inhre takmeuh em ? He fakna hla phuahtu thinlung ang tawmpui thei hi vawiina Kristiante zingah hian kan tamin ka va’n ringlo em ! He hla hi hla huaisen leh chona ropui tak mai a ni a. Thinlung taka sa tur chuan huaisen a ngai dawn hle niin ka hre thin.

  

Misual, chapo leh thinlung luhlul tak, dawihzep tak si ka nih avang hian he hla thinlung taka sa tur hian ka huaiusen tawklo tih ka hria a. He hla ka tih bawrhbanna ni lo se, ka tan chuan, “Isu vawiinah hian I thinlung bawnginah, Lo piangthar  ila nang ka chatuan Lal turin..”  ti a sa zawk tur niin ka inhre thin. Lal Isua keimaha a pian chuan kei tehlul hian ka chawitlei zo dawnlo tih ka hria a. Keimah zawk hi  Amahah piangin Amah ngeiin min chawitlei ka mamawh a.

Amah ah ngei piang hmasa ila, min chawiin min awmtlei anga; a hnung zuiin Thinlung Bawngin nei thei turin min buatsaih ngei ang tih ka ring. Chutih hunah chuan He fakna hla mawi tak hi huaisenna nen thinlung takin ka sa ve thei tawh ngei ang le.