Outlaw

CONVICT

Ka nun chhungril chu a rum tlawk tlawk a;pachang taka tuar tumin ka theihtawp takmeuh takmeuh ka chhuah a. Mahse tuar aharina va’n na tak em! Ka mittui dan kir tumin ka mit ka khap sawk sawk a; ka dang zo silo.Mittui bual velin ngam leh ngamlo chung hian ka han hawi chhuak a. Min thlirtu mipui te chu ka hmu phe rei ruai a. Beiseina reng reng nei tawhlo, mi beidawng, nun tla chhe mek hmel hmuh chaka min thlirtu mipuite chu ka va’n zah tak em!

Police in min karcheha,ka banrek te chu hand-cuff a thlun zawm a ni a. Ka kut ka chet vel zawng chuan min thlunna thir khaidiat chu a ri leh chhawng thina; ri a zawnga ri rapthlak ber leh ngaihawmlo ber niin ka hria.

Tualthata puh ka ni a, court-in thiamloh min chantir hlim hlawl a ni. Min chhantu ka ukil chuan a theihtawp takmeuh a chhuah niin ka hria. Mahse min khingtu lam tanfung a fuh tha ema,min chhan chhuak thei ta lo a ni. Thuhretu rinawm tak tak an koh chhuah theih laiin,keiin thuhretu koh chhuah tur pakhat pawh ka hre ve silo. Ka thuhretu chu Pathian a ni a, mahse court-ah ka ko chhuak thei silo. Naupan tet ata ka lo rin, rinawm-lo ve ngailo ka Pathian khan min phatsan ta em ni !?

Kum 10 chhung Jail tang tura Convict ka ni a; hei pawh hi hremna nep thei ang ber niin roreltuten min hrilha. Engvangin nge min tihhlum law law zawk loh chu le aw….

Thubuai sawina hmun atangin Police venna hnuaiah Central Jaila thawn turin hren hran na hmun(court lock-up)ah min dah lut a.

Chanchinbu mi leh local T.V thlalatute,beiseina sang tak nena ka lo thlir thin; ka dikna puangzara, zalenna kawngka min thlen tura ka lo ngaih te chu ka mualphona tura mipuite palai hnathawktu ang hrimin ka hmu zo tawh a.Ka dikna leh Rinawmna zawng zawng te chu nuihzatthlak an chang zo ta em ni?Mipuite sorkar,mipuite siam Democracy ram;ka ram ngei chuan ka dikna chanvo mi humhalh sak ahnehin min vawthlu a,diriam tak a min chil zuiin chil hial min chhak tak hi!!

                                               BUNG - 1

CHHUNGKUA

Thlahtu atanga chhungkua zahawmna, chhuanawmna emaw hmingthanna emaw sawi tur ka hre lova. Dik tak chuan sawi tur ka hre lo mai ni lovin min thlahtute hi ka pi thleng(ka pa nu) bak hi a hriatin ka hrelo reng reng zawka. Ka pa pawh khan a hre tamlo ngawtin ka ring. Dilchhutna chang ka hriatloh bakah ka pi thuruk ni-ah ka ngai a,hriat ka tum lemlo.

Ka seilenna chhungkua erawh chu chhungkua duhawm tawpkhawkah ka ngaia.Kan chhungkua kha kan khawvel chu zimte leh mawlte ni mahse kan hlim a,kan lung a awi em em a ni.

Nupa ka hmuh tawh zingah ka nu leh pate baka nupa inhmeh leh in hmangaih tawn thiam sawi tur ka hrelo.An mawl ang angin an inzahtawna.An zahawmna chu sang lua lo mahse kan chhungkuaah chuan chawimawiin a awm tlat a ni.Kan unau a kan hriat leh mithmuhah tawngkam vin chu sawiloh,thu inbat suala inhnialna an neih tak awm pawh sawi tur ka hrelo. Chu chu ka nu leh pate nunze ropui tak,vawiin ni thleng a ka ngaihhlut em em a ni

Ka nu leh pate chanchin sawi hi ka tan chuan a nuamin sawi nin theihloh a ni reng fo a. Mahse an thlahtu atanga mi zikbul lutuk an nihna hian rilru a tihnat chang a awm ve fo thina, ka lainatna hi a ti thar zual leh thin. Hlim taka an awm chhung a rei lo em em a. An pian atanga an thihni thlengin vanduaina in a um phak zat zat ni berin ka hre thin. Mahse ka sawilan duh leh thin erawh chu chutianga vanduaina kutchhuak ang hiala an hun a kal laia an hlimni tawite erawh kha zawng reilo hle mahse a vawrtawp a thleng niin ka hria. An in hmangaihna, hun reilote; an damchhung thleng phak ni si kha.

Thlahtu bul chhui thei turin ka pa hi a pian danin zir se,zahpuiawm anih bik ka ring lova,chu chu ka rindan mai a ni a, a dikna erawh ka hrelo kumkhua dawn a ni ang e. Rokhum hnam ani tih hi ka hriat tawp ani ringawt mai a. Rokhum hnam hi Mizo History kan en chuan hnam zahpuiawm tak an ni bik lova. Mizo lal hnam zing a tel pha ngat an ni. Chuvang chu a nia, ka pa hi an thlahtu chu an zahpuiawm biklo ange ka'n tih ve ngawt na chhan ni.

A lo pian danah ka pa hi ka pi khawlai fa a ni a. Chu chu Sawn tihna a ni. Ka pu(ka pa pa) lamah chhui tur engmah ka hre lova, ka piin min hrilh heklo. Sawitawh angin ka pi thuruk a ni ange. Mahse ka pi hian a fa pa (Ka pu)hi a hmangaih hle ani tih a hriat theih, a chanchin engmah sawilang ngailo mahse ka pa a han tulpui thak mai bakah a hmingah pawh an thlahtu ngei chawi a Rokhuma ti a a han puttir danah hian ka pi rilru tur chu a lang thei viau niin ka hria a. Ka pi thuruk chu hmangaihna a khat a ni ngei ang.

Ka pi te hi Khawzawl Darngawn khua niin he khua ah hian ka pa pawh hi a pianga. Ka pi hian nuta pakhat neiin an unau hian fahrah taka awm anni awm e. Ka pi nuta, ka pu chuan tuna kan khua Hnahlan nula nupui ah neiin an pute belin Hnahlanah hian an lo pem luta.Ka pi pawh chuan ka pa ,la naupangte chu hruaiin a rawn zui ve zel a ni. Sawi hreawm tak mai chu ka pu nupuite chhungkua hian ka pi chu an ngai thei riau lo mai a. Ka pu lah nupuite chhungkaw bel ve mai alo ni bawk nen.Ka pi chuan ka pa chu baihvai takin a hmeithai pui ta a. Ka pu a thih hnuah phei chuan chhungkaw in zawmna ka nei zui ta reng renglo a ni ber.

Tichuan chi leh kuang,vua leh vang pawh nei lovin ka pate nufa chu an hmeithai ve ta nawk nawk a. Chi bul lutuk nih a hreawm zia ka pa hian a sawi chhuah zauh zauh ka hre thin. Tin, keimahni ngei pawhin kan dai chho ve zel a. A thuhrimah khawchhak lam ah hian kan chi pui te hriat kan nei lem lo a. Chi vang leh tam lemlo kan lo ni ve reng te pawh a ni ang.

Ka pa hi pa lian, hmeltha leh taima rumrut mai a ni a. Khawkhat tlangval sawi ve hat tham chu ani ve thin awm e. Amaherawh chu hmeithai fa akara chi bul lutuk a lo ni bawk nen.Thiamna lamah pawh rual el ve thei dinhmun ah a ding lo a, ziak leh chhiar a thiam a ni mai a. Finna leh thiamna kawng ah thleng sang lo mahse a phak ang tawka rual-el mi leh mahni inzir mi ani a. Hmuhsitawm leh zahpuiawm in a awm ngailo. A theih ang chinah kohhran leh khawtlang ah a in hmang ve thin hle a, Y.M.A hruaitu hlun tak a lo ni ve thin. Sakhaw mi renrun a ni lemlo a, ngaih dan zau tak, a hun leh a hmun a zira rilru sukthlek thiam mi tak a ni.Ka pa nunah khan entawn tur tam tak ka hmu a. A hniakhnung ka zui zo lo em em tih ka hria. A nun kha ka ngaisangin ka zah em em a, ani ang pa ka nei hi ka rilru chhungril taka ka inchhuan ruk ve em emna a ni.

Kut themthiam tak mai a ni a, pheikhawk, nihliap leh torch light chhe siam that a thiam em em a. Kan khuaah chuan an pan ve ber a ni. A thilsiamte hi man han man tham em em a ni lem lova, eizawnna atan rinrawl a neih theih a ni lem lo. Pawisa a harsa a, kan khua hi mihring kan tam lem lo bawk nen. Tin, amah hi pa tlawmngai leh inthlahrung mi a lo ni bawk nen. Chhungkaw khawsak erawh chu a tihzangkhai phah em em a. Kan eizawnna pui ber erawh chu thingtlang lo neih a ni ve mai.

Ka pa fahrah tih tawh nak alaiin a dinhmun aia tha chuang bik miahlo ka nu nen hian an innei mauh mai a. Ka nu dinhmun hi ka pa aimah hian a chhe zawk awm asin.

Unau pianpui pawh nei hman lovin a sentet lain ka nu hi a nuin a thihsan a. Tlei pawh a la tlei a hmain nuhrawn a hrawn chho a. Ka nu dinhmun leh a hun lo hman chhoh dan hi a rapthlak hial zawk a ni. Amahin a chanchin min hrilh ngai lova, mahse ka pi khan ka nu chan rapthlakzia hi thawnthu ang main min hrilh thin.

Nuhrawn sual hrawn rapthlakzia chu pawnlam lang thei maiah ni lovin,chhungrul nunah a lang nasa hle niin ka hria. Chu chu ka nu nunah a lang tlat a ni.

Ka nu hi ka pa nen innei ta lo se eng angin nge a dinhmun a kal zel ang aw ka ti thin. Dik tak chuan a mizia a hriam em em a, mahni induhna leh inngaihsanna a neilo reng reng. Mi mitmei veng reng reng leh ti dekin a nun a hmang a, a nun a rethei em em a ni. A fate pawh hian chu chu kan la hmu thiam pha a ni.

Hmeichhia a zawnga hmeichhe nunnem leh nun zawi ber mai; nun tlachhe tep tawh, ka pa hmangaihnain a kaihchhuah ni berin ka hria. Ka pain duat leh thiam taka a enkawlna avangin ala tawn ngai reng reng loh hlimna chu a chhar chhuak a ni. An nupa nun hi ka pa avanga par chhuak a tih loh theihloh niin ka ngail A bul ber erawh chu an inhmangaih tawnna chuan an nupa nun a chawimawi a ni.

Ka nu leh pa chanchin hi sawi tur a tam em em a,thawnthu a tling a, an nuna harsatna lungchhiatthlak tak tak inzep tam tak hi vawiin ni thlenga anmahni ka lainatna tizualtu an ni a. Vawiin thleng hian ka hmangaih zual zel thin a. An damlaia ka chawimawi tawk thiam lo te, an nawmsakna tur ka lo ngaihtuah sak theilo te kha aw….Ka thiamloh a ni bik em ni ? Pathian remruat runthlak tak a va ni em !! Pathian laka vui mai hi thil awl tak a lo ni.

Ka pi erawh kha chuan a lo tuar fan fannate, a thawhrimna te chu rah duhawm tak sengin a kalsan niin ka hria a. Ka nu leh pa hmangaihna thuk tak a chang a, mi angin nuamsa le lu lo mahse hahdam taka tar kunin, a tute min awm tlei a, a thawhrim rah ropui zawka seng turin mual a liam a ni. Ka pi te kha ka ngai vawng vawng thin. Hmangaihna awmzia lang theia min zirtirtu a ni.

Sawi tawh angin ka nu leh pate chu mi bul tak an nih avangin an theih anga tam fa neih pawh an tum viau a. Mahse kei leh ka nau(farnu) bak kan pian a remlo a ni ang. Hrisellohna pawh nei hranpa lem lovin ka nu hian nau a hring zui ta lo a ni.

Kan chhungkaw lo chawrchhuah dan chhuanawm loh tak mai chu, chu chu a ni a. Kan chhungkaw nun hretu chu kan khuate an ni a, ka infak emaw, ka insawisel emaw avanga kan hmingthatna leh hmingchhiatna in kori a tu lem lovin ka ring a. Mihring ropuina chu a thlirtu ah a innghat a; a chinchhuaka sawi vek ka tum lem lo.

Tin, ka hming chu Lalremruata a ni a, ka chhungten ‘Mama’ tia min koh, thenrualten ‘Ruata’ tia min koh ka ni a, ka nau hi ‘Hmangaihzuali’ a ni a, ‘Mami’ kan ti ve leh mai a. Ka pa hming chu ka sawi taw hang khan Rokhuma a ni a, ka nu hming Rozami, ka pi Chhingpuii a ni. Chu chu kan chhungkhua a ni e.

(Chhunzawm zelah...)